विराटनगर । शनिबार बिहान मोरङको कानेपोखरी गाउँपालिका–७ मा कन्टेनरमा टाटा सुमो ठोक्किँदा दुई जनाको मृत्यु भएको छ। दुर्घटनामा चालकसहित अन्य ६ जना घाइते भएका छन्।
पूर्वबाट पश्चिमतर्फ जाँदै गरेको ना ३ ख ६९१८ नम्बरको कन्टेनरमा सोही दिशाबाट आउँदै गरेको बा ११ च ७९४८ नम्बरको यात्रुबाहक टाटा सुमो बिहान ५ बजे ठोक्किएर दुर्घटना भएको थियो ।
प्रहरीका अनुसार काठमाडौंबाट यात्रु लिएर झापा जाँदै गरेको टाटा सुमो दुर्घटनामा परेको हो। दुर्घटनामा झापाको गौरादह नगरपालिका–४ का ४५ वर्षीय प्रकाश मगर र झापाकै अर्जुनधारा नगरपालिका–४ का ४७ वर्षीय रामकुमार आछामीको मृत्यु भएको थियो ।
यस्तै दुर्घटनामा घाइते हुनेमा गौरादह–४ की दुर्गा मगर, योगेश न्यौपाने, प्रविका मगर, बबिता मगर र काभ्रेको भुमुटार नगरपालिका–८ का रमेश तामाङ रहेका छन् भने सुमो चालक झापाको दमक नगरपालिका–२ कूलबहादुर रेग्मी पनि घाइते भएका छन्। घाइते प्रविका र बबिता मृत्यु भएका प्रकाशका छोरी र श्रीमती हुन्।
