काठमाडैँ । उत्तर कोरियाका नेता किम जोङ उन आफ्नो हजुरबुबाले जस्तै रेल चढेर भियतनाम पुगेका छन् ।
उन चार हजार दुरी पार गर्द आफ्नो हजुरबुबा उत्तर कोरियाली पहिलो नेता किम इल सुन जस्तै गरि रेलमा भियतनाम पुगेका हुन् । किमसँगै उनकी बहिनी किम यो जोङ र प्रमुख मध्यस्थकर्ता पूर्वसैनिक किम योङ चोल पनि भियतनाम आएको अनुमान गरिएको छ ।
अमेरिकी राष्ट्रपति डोनाल्ड ट्रम्पसँगको वार्ताका लागि उनी भियतनाम आएका हुन् । गत वर्ष सिंगापुरमा भएको वार्ताको निरन्तरतामा अर्को वार्ता भियतनाममा हुन लागेको हो । उनको स्वागतमा डोङ डाङ सीमासम्म रातो कार्पेट विछ्याइएको थियो ।
किम आउनुअघि डोङ डाङ स्टेशन सर्वसाधारणका लागि बन्द गरिएको थियो । त्यहाँबाट उनलाई स्कर्टिङसहित राजधानी हानोइ लगिएको छ । अब उनले कारमा १७० किलोमिटर यात्रागर्नेछन् ।
वार्ताका लागि अमेरिकी राष्ट्रपति ट्रम्प मंगलबार अबेर भियतनाम आउने कार्यक्रम छ । ट्रम्प र किमबीच बुधबार बेलुका एक्लाएक्लै कुराकानी गर्ने कार्यक्रम तय भएको छ । त्यसपछि उनीहरुले आफ्ना सहयोगीलाई पनि साथमा राखेर सँगै डिनर गर्ने ह्वाइटहाउसका प्रवक्ता सराह स्यान्डर्सले उल्लेख गरेका छन् । ट्रम्प र किमले बुधबार पनि अर्को चरणको वार्ता गर्नेछन् ।
सिंगापुर वार्ताका क्रममा उत्तर कोरियालाई निशस्त्रीकरणको बाटोमा लैजान दुबै पक्ष सहमत भएका थिए । तर यो विषय अमुर्त भएकाले कार्यान्वयन हुन सकेको थिएन । भियतनाममा हुने वार्ताले दुबै देश मिलेर निशस्त्रीकरणको बाटोमा लैजान सहमत हुने विस्वास गरिएको छ ।
