काठमाडौँ । स्पेनिस कल्ब बार्सिलोना युरोपियन च्याम्पियन्स लिग अन्तर्गत राउन्ड अफ १६ को पहिलो लेगमा फ्रेन्च क्लब लियोनसँग गोलरहित बराबरीमा रोकिएको छ ।
लियोनको घरेलु मैदानमा मंगलबार राति खेलिएको प्रतिस्पर्धात्मक खेलमा बार्सिलोनाले बराबरीमा चित बुझाएको हो ।
लियोनका गोलरक्षक एन्थोनी लोपेसले बार्सिलोनाका शसक्त प्रहारलाई सजिलै विफल पारेका थिए । मध्यभाग र पोस्ट प्रहारमा समेत एकतर्फी प्रदर्शन गरेको बार्सिलोनाको सबै प्रयासमा लोपेस एक्लै पहाड बनेर उत्रिए ।
५९ प्रतिशत बल नियन्त्रणमा लिएको बार्सिलोनाले खेलभर २५ वटा पोस्ट प्रहारको अवसर सिर्जना गरेको थियो । स्टार खेलाडी लियोनल मेस्सी, लुइस स्वारेज, फिलिपे कोउटिन्हो, ओउसमाने डेम्बेले लगायत खेलाडीलाई उतारेको बार्सिलोनाले अन्ततः गोल गर्न सकेन ।
बार्सिलोनाले च्याम्पियन्स लिगको नकआउट चरणको अवे खेलमा जित निकाल्न नसकेको यो छैटौं पटक हो ।
यी दुई टोलीबीचको दोस्रो आगामी मार्च १३ मा बार्सिलोनाको घरेलु मैदान क्याम्प नोउमा हुनेछ ।
