काठमाडौँ । स्पेनिस ला लिगा फुटबलमा रियल मड्रिड जिरोनासँग २–१ गोलअन्तरले पराजित भएको छ ।
हिजो भएको खेलमा घरेलु टोली रियल मड्रिड १७ औं स्थानमा रहेको जिरोनासँग पराजित भएको हो । जिरोनाको जितमा क्रिष्टयन स्टुआनी र पोर्चुगुएज मान्जनेराले गोल गरे । यता रियल मड्रिडका लागि कासिमिरोले गोल गरे ।
रियलले सुरुवाती समयमै लिएको अग्रता जोगाउन सकेन । खेलको २५ औं मिनेटमा कासिमिरोले गोल गर्दै अग्रता दिलाएका थिए । पहिलो हाफमा १–० गोलले पछि परेको जिरोनाले दोस्रो हाफमा दुई गोल गर्दै जित निकालेको हो ।
खेलको ६५ औं मिनेटमा पेनाल्टीबाट स्टुआनीले गोल गर्दै १–१ गोलको स्थितिमा ल्याएका थिए । त्यस्तै, ७५ औं मिनेटमा पोर्चुगुएजले गोल गर्दै २१ गोलको अग्रता दिलाए ।
खेलको ९० औं मिनेटमा रियलका कप्तान सर्जियो रामोसले डबल पहेलो कार्ड खाएसँगै रेड कार्ड पाउँदै मैदानबाट बाहिरिएका थिए ।
हारसँगै रियलले लिगको दोस्रो स्थानमा उक्लिने अवसरलाई गुमाएको छ । २४ खेलबाट रियलको ४५ अंक भएको छ । लिगको शीर्ष स्थानमा रहेको बार्सिलोनाको भने २४ खेलबाट ५४ अंक हुदा दोस्रो स्थानमा रहेको एट्लेटिको मड्रिडको २४ खेलबाट ४७ अंक छ ।
