काठमाडौँः संवैधानिक हैसियतमा रहेकाे लोकसेवा आयोगले सरकारले हालै तोकेको नयाँ मर्यादाक्रममाथि विमति जनाएको छ ।
बिहीबार बसेको आयोगको बैठकले संवैधानिक निकायका सदस्यको मर्यादाक्रम साविकको जस्तै संवैधानिक निकायका प्रमुखको लगत्तैपछि कायम गर्न सरकारसँग आग्रह गरेको छ ।
आयोगद्वारा जारी विज्ञप्तिमा भनिएको छ, “संवैधानिक निकायका पदाधिकारीको मर्यादाक्रम साविकको भन्दा निकै तल्लो क्रममा राख्नुले संवैधानिक पदाधिकारीको मात्र अपमान नभई समग्रमा संवैधानिक निकायकै संस्थागत मर्यादामा ह्रास भएको छ ।”
मर्यादाक्रम निर्धारण गर्दा परम्परा, प्रचलित कानून, पदको भूमिका र गरिमालाई आधार मान्नुपर्नेमा कुनै मापदण्डविना कसैलाई माथिल्लो क्रममा राख्ने अभिष्टले गलत निर्णय भएको आयोगले जनाएको छ ।
मर्यादाक्रमप्रति अन्य निकायका पदाधिकारहरूकाे समेत असन्तुष्टि बाहिर अाइरहेकाले पनि याे निर्णयकाे अपरिपक्वता स्वतः सिद्ध भएकाे छ । यसर्थ यसलाइ संशाेधन गरी संवैधानिक निकायका सदस्यहरूकाे मर्यादाक्रम साविककाे जस्तै संवैधानिक निकायका प्रमुखहरूकाे लगत्तै पछि कायम गर्न सरकारसँग अाग्रह गर्दछ, अायाेगकाे विज्ञप्तिमा भनिएकाेछ ।
