चितवन । नेकपा एमालेका नेता सुवास नेम्वाङले अरुलाई वरिष्ठ उपाध्यक्ष बनाए चुनाव लड्ने घोषणा गर्नुभएको छ । एउटै होटलमा बसेका तर प्रत्यक्ष कुराकानी हुन नसकेका पार्टी अध्यक्ष केपी शर्मा ओलीलाई आफूले वरिष्ठ उपाध्यक्ष पदको दावी नछाडेको सन्देश पठाउनुभएको छ ।
चितवनमा जारी एमालेको महाधिवेशनमा हिजो बन्द सत्र सुरु हुनुअघि नै नेम्वाङले चुनावमा आफू वरिष्ठ उपाध्यक्षमा उठ्ने बताउनुभएको थियो । वरिष्ठ उपाध्यक्षको दावेदारी ईश्वर पोखरेलले पनि गर्नुभएको छ । यद्यपि ईश्वर पोखरेलले नेम्वाङलाई पार्टीले अवसर पाएको खण्डमा राष्ट्रपति बनाउने लोभ देखाउनुभएको थियो ।
एमालेको महाधिवेशनमा हिजोको बन्द सत्रले पदाधिकारी र केन्द्रीय सदस्य चयन गर्ने सर्वाधिकार अध्यक्ष केपी शर्मा ओलीलाई दिएसँगै उहाँलाई अब आफ्नै समूहमा सर्वसम्मत गराउन निकै कठिन हुने देखिएको छ । नेम्वाङले वरिष्ठ उपाध्यक्ष पदको दावी नछाडेपछि आज बिहान १० बजे प्रस्तुत गर्ने कार्यसूची अहिलेसम्म तयार नभएको बुझिएको छ ।
नेता नेम्वाङलाई उनी निकट आदिवासी, जनजाति समुदायका नेता कार्यकर्ताले वरिष्ठ उपाध्यक्षको दाबी नछाड्न दबाव दिएका छन् । नेम्वाङले अध्यक्ष ओलीबाहेक आफूभन्दा माथिको नेता कोही नभएको भन्दै वरिष्ठ उपाध्यक्षको दावी गर्दै आउनुभएको छ ।
