काठमाडौं । नेपाल युएईसँग पराजित भएसँगै आइसिसी टी–२० विश्वकपको विश्व छनोट प्रतियोगितामा पुग्न असफल भएको छ ।
टी–२० विश्वकपअन्तर्गत एसिया छनोटको आफ्नो अन्तिम तथा निर्णायक खेलमा नेपाल आइतबार घरेलु टिम युएईसँग ४८ रनले पराजित भएको हो ।
युएईलाई पराजित गरेको अवस्थामा मात्र नेपाल पहिलो पटक विश्व छनोटमा पुग्ने थियो ।
नेपाललाई पराजित गरेसँगै युएई भने एसिया छनोटबाट विश्व छनोटमा पुगेको छ । एसिया छनोटबाट एक टिम मात्र विश्वकपमा छनोट हुने प्रावधानअनुसार युएईले खेलेका पाँच खेलमा नै जित निकाल्यो।
आइतबार दुबईमा भएको खेलमा घरेलु टिम युएईले दिएको १२८ रनको लक्ष्य पछ्याएको नेपाल २ बल खेल्न बाँकी छदा ७९ रनमै अलआउट हुन पुग्यो ।
नेपालकी ओपनर सीता रानामगर ८ बल खेलेर १३ रन जोड्दै आउट भइन् । त्यसपछि ब्याटिङमा आएकी कविता कुँवरले ४ रन मात्र जोड्न सकिन् । कप्तान रुबिना क्षेत्री २ रनमा आउट भइन्।
ओपनर इन्दू बर्माले १५ रनको योगदान दिइन् भने सरिता मगर र काजल श्रेष्ठ ८–८ रनमा आउट भए ।
बलिङमा चार ओभरमा ५ रन मात्र खर्चेर युएईकी समिराले ४ विकेट लिइन् । खुसी शर्मा र चामनी सेनेभिरत्नाले २–२ विकेट लिए।
त्यसअघि टस हार पहिले ब्याटिङ गरेको युएईले ५ विकेटको क्षतिमा १२७ रन जोड्यो। युएईका लागि चामनी सेनेभिरत्नाले ३६ बलमा ५२ रन जोडिन् ।
यस्तै तीर्था सतिशले ४६ बलमा ४७ रन जोडिन् । उनले ४६ बलमा ३ चौका हिर्काइन् । यस्तै काभिशाले २२ रन बनाइन् ।
बलिङमा नेपालकी कविता कुँवरले २ विकेट लिइन् भने सबनम राई, सीता रानामगर र संगिता राईको नाममा १–१ विकेट रह्यो ।
