काठमाडौं । सत्तारुढ नेकपाका सांसद योगेश भट्टराईले आफूलगायतका सांसदबारे डा.गोविन्द केसीले गरेको टिप्पणीमाथि असन्तुष्टि व्यक्त गरेका छन् । भट्टराईले डा.केसीमाथि टिप्पणी गर्दै केसीले बारम्बार आफ्नै स्तर स्खलित गर्ने गरेको गम्भिर आरोप लगाएका हुन् ।
केसीले आफूसँग भएका सहमति विपरीत शिक्षा तथा स्वास्थ्य समितिअन्तर्गतको उपसमितिले चिकित्सा शिक्षा विधेयकसम्बन्धी प्रतिवेदन बहुमतले पास गरेपछि आक्रोसित भएका थिए ।
केसीले भट्टराईसहित नेकपाका केही सांसदको नाम लिदै सांसदहरु अब जनतामारा पारामा उत्तिएको र माफियाको पासोमा परेको आरोप लगाएका थिए ।
सोमबार नै बसेको शिक्षा समितिको बैठकमा भट्टराईले डा.केसीको अभिव्यक्तिप्रति असन्तुष्टि जनाएका छन् ।
भट्टराईले भने, ‘प्रधानमन्त्री र हाम्रो पार्टीको अध्यक्ष प्रचण्डबारे जे शब्द प्रयोग गर्नुभएको छ । उहाँले आफ्नो स्तर स्खलित गर्नुभएको छ । यसरी प्रतिवादमा उत्रनु राम्रो होइन ।’
आफ्ना शब्दहरुलाई सही ढंगले प्रयोग गर्दा डा.केसीको पनि इज्जत हुने भट्टराईले बताए ।
