चितवन । नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवालाई पनि काम गर्न गाह्रो भएको बताउनुभएको छ । चितवनको नारायणी नदी किनारमा पार्टीको १० औँ राष्ट्रिय महाधिवेशनको उद्घाटन सत्रमा उहाँले आफू प्रधानमन्त्री हुँदा अप्ठ्यारो पार्ने र खुट्टा तान्नेहरुले नै आज प्रधानमन्त्री देउवाको पनि खुट्टा समातिरहेको बताउनुभयो ।
उहाँले पार्टीको महाधिवेशनमा अतिथि बनाइनुभएका प्रधानमन्त्रीप्रति कुनै टीकाटिप्पणी गर्न नहुने उल्लेख गर्दै भन्नुभयो, “प्रधानमन्त्री अहिले यहीँ हुनुहुन्छ, उहाँलाई अतिथि बनाएर सरकारका बारेमा टिप्पणी गर्नु हुँदैन, तर उहाँलाई पनि गाह्रो छ, मलाई अप्ठ्यारो पार्ने र काम गर्न नदिनेहरुले नै उहाँको पनि खुट्टा तानिरहेका छन् ।”
उहाँले देउवासमक्ष आगामी आम निर्वाचनमा नेकपा एमालेको सरकार बन्ने बताउनुभयो । स्थानीय चुनावमा ५० प्रतिशतभन्दा बढी सिट एमालेले हासिल गर्ने दाबी गर्दै भन्नुभयो, “प्रधानमन्त्रीलाई एउटा गोपनीय कुरा खुस्काउनुपर्ने भो, आगामी चुनावपछि नेकपा एमालेको सरकार बन्छ ।”
