काठमाडौं – जापानले डोटी जिल्लाको एउटा नगरपालिका र दुईवटा गाउँपालिकाको सामुदायिक तथा विद्यालय विपद् पूर्वतयारीमा सुधार ल्याउन करिब नौ करोड रुपैयाँ सहयोग गर्ने भएको छ ।
उक्त सहयोग सम्बन्धी सम्झौतामा नेपालका लागि जापानी राजदूत मासामिची साइगो र वल्र्ड भिजन जापानका परियोजना व्यवस्थापक नाओमी काटोबीच जापानी राजदूतावासमा शुक्रबार आयोजित समारोहमा हस्ताक्षर भयो ।
नेपालस्थित जापानी राजदूतावासका अनुसार उक्त रकम जापानको आर्थिक वर्ष २०१८ को जापानी गैसस परियोजना कार्यक्रम अन्तर्गत प्राप्त अनुदान हो ।
परियोजनाबाट खासगरी सुरक्षित सिकाई वातावरणमा विद्यार्थीको पहुँच बढाउने, विद्यालय र समुदायमा विपद जोखिम व्यवस्थापन प्रणालीमा सुधार ल्याउने तथा सामाजिक जवाफदेहीता तथा पैरवी प्रयत्न मार्फत विद्यालय सुरक्षासम्बन्धी प्रणाली र नीतिमा सुधार ल्याइनेछ ।
जापानी राजदूतावासले उक्त सहयोगबाट नेपाल र जापानका जनताबीच जनस्तरको सम्बन्ध विकास गर्न मद्दत गर्ने विश्वास व्यक्त गरेको काठमाडौंस्थित राजदूतावासले जनाएको छ ।
