आज राति १२ बजेबाट संसद् सचिवालयको संघीय संसद् (प्रतिनिधिसभा र राष्ट्रियसभा) को वर्षे अधिवेशन समाप्त हुँदैछ । आजको बैठकमा सभामुख कृष्णबहादुर महराले अधिवेशनका क्रममा भएका गतिविधिबारे जानकारी गराएर मात्रै अधिवेशन अन्त्यको घोषणा गर्नेछन् ।
राष्ट्रपतिबाट संसद् अन्त्य र आह्वान गर्ने व्यवस्था छ । त्यसका लागि सरकारको सिफारिस अनिवार्य मानिन्छ । यही संवैधानिक व्यवस्थामा टेकेर राष्ट्रपति कार्यालयले संसद् सचिवालयलाई अधिवेशन अन्त्यको पत्रमार्फत जानकारी गराएको बुझिएको छ ।
संवैधानिक व्यवस्थाअनुसार अधिवेशनको समाप्ति र अर्को अधिवेशनको प्रारम्भबीचको अवधि ६ महिनाभन्दा बढी हुनु हुँदैन । गत वैशाख २३ देखि शुरु भएको वर्षे अधिवेशनमा प्रतिनिधिसभाको बैठक आजसहित ७९ औं पटक र राष्ट्रियसभाको ६१ औं पटक बसेर अन्त्य गर्न लागिएको हो ।
