काठमाडौं भदौ १० । सत्ता साझेदार नेकपा एमाले र काँग्रेसबीच राजनीतिक नियुक्तिको विषयमा खटपट शुरु भएको छ ।
नयाँ बानेश्वरस्थित संविधानसभा भवनमा विहीबार बसेको स्थायी कमिटी बैठकले काँग्रेससँग विषयमा छलफल गर्न स्थायी कमिटी सदस्य माधवकुमार नेपालको संयोजकत्वमा पाँच सदस्यीय कार्यदल गठन गरेको छ । समितिमा उपाध्यक्ष बामदेव गौतम, महासचिव ईश्वर पोखरेल, उपमहासचिव विष्णुप्रसाद पौडेल र सचिव भीम आचार्य रहेको प्रचार विभाग प्रमुख योगेश भट्टराईले जानकारी दिए ।
मूख्य सचिव, पुनर्निर्माण प्राधिकरणको प्रमुख कार्यकारी निर्देशक र चार विश्वविद्यालयमा उपकूलपति नियुक्त गर्दा काँग्रेसले एकलौटी निर्णय गरेको एमाले आरोप छ । यी वाहेकका राजनीतिक नियुक्तिमा पनि साझेदारसँग परामर्श नगरेर संयुक्त सरकारको आचारसंहिता र सहकार्यको संस्कृति अनुरूप नरहेको एमाले ठहर छ ।
त्यसैगरी एमालेले संविधान निर्माणमा विभिन्न पक्षहरूबाट आएका गुनासो, असन्तुष्टि र मागलाई स्वाभाविक भएको ठहर गर्दै मागलाई संविधान निर्माणको क्रममा सम्बोधन गर्न अधिकतम् प्रयास गर्ने निष्कर्ष निकालेको छ ।
बैठकले आन्दोलनरत पक्षलाई वार्ताबाट समस्या समाधानका लागि आव्हान गरेको छ । त्यसैगरी शान्ति सुरक्षा कायम गर्न सुरक्षाकर्मीहरूले गरेको प्रयासप्रति सराहना व्यक्त गर्दै अझ दृढ भएर कत्र्तव्य पालनाका लागि आह्वान गरेको छ ।
