काठमाडौं । सहिद स्मारक ‘ए’ डिभिजन लिग फुटबल प्रतियोगिता आज (शुक्रबार)बाट सुरु हुँदैछ ।
त्रिपुरेश्वरस्थित दशरथ रंगशालामा उद्घाटन खेलमा सातदोबाटो युथ क्लब र फ्रेन्ड्स क्लबबीच प्रतिस्पर्धा हुनेछ । उक्त खेल ४ः४५ बजे सुरु हुनेछ ।
दुबै टिम जित निकाल्दै लिगमा सुखद सुरुवात गर्ने योजनामा रहेका छन् ।
सातदोबाटोले पहिलो पटक शीर्ष डिभिजनको लिग खेल्न लागेको हो । 'बी' लिगको उपाधि जित्दै सातदोबाटो यसै वर्ष शीर्ष लिगमा बढुवा भएको हो ।
यता लामो समयबाट लिग खेल्दै आएको फ्रेन्ड्सले उपाधि जित्न सकेको छैन ।
कुल ९१ खेल हुने लिगमा 'ए' डिभिजनका १४ क्लबले प्रतिस्पर्धा गर्नेछन् ।
यस पटक लिगको पुछारमा रहने दुई टिम रेलिगेसनमा पर्दै 'बी' डिभिजनमा घटुवा हुनेछन् ।
यसअघिको सिजनमा मछिन्द्र क्लब च्याम्पियन बनेको थियो । यस पटकको लिग विजेताले ७५ लाख पाउनेछ भने उपविजेताले ५० लाख प्राप्त गर्दा तेस्रो हुनेले २५ लाख पाउनेछ । लिगको मुख्य प्रायोजकको रुपमा कतार एरवेज रहेको छ ।
