काठमाडौं । नेपाली कांग्रेसका नेताहरुले स्थानीय तहको निर्वाचनमा पार्टी एक्लैले जित्ने अवस्था रहेको ठाउँमा गठबन्धन आवश्यक नरहेको बताएका छन् ।
शुक्रवार पार्टीको केन्द्रीय कार्यालयमा सुरु भएको केन्द्रीय कमिटी बैठकमा बोल्दै केन्द्रीय सदस्यहरुले आगामी २०७९ बैशाख ३० गते हुने स्थानीय तह निर्वाचनमा कांग्रेस एक्लैले जित्ने ठाउँमा गठबन्धन आवश्यक नरहेको बताएका हुन् । बैठकबारे सञ्चारकर्मीहरुलाई जानकारी दिदैँ नेपाली कांग्रेसका प्रवक्ता प्रकाशशरण महतले गठबन्धन गर्दा पार्टीले जित्ने ठाउँमा गठबन्धन गर्ने र गठबन्धन बिना जित्ने ठाउँमा गठबन्धन नगर्ने भनि केन्द्रीय सदस्यहरुले मत राखिरहेको बताउनुभयो । प्रवक्ता महतले सभापति शेरबहादुर देउवाले स्थानीय तह निर्वाचनमा गठबन्धन गर्न जर्बजस्त निर्णय लाद्न खोजेको भनि गलत प्रचार गरिएको बताउनुभयो ।
उहाँले पार्टी सभापतिले जर्बजस्त निर्णय नलाद्ने र यसको सम्बन्धमा निर्णय केन्द्रीय कमिटी बैठकले गर्ने बताउनुभयो । स्थानीय तहको आवश्यकता र वस्तुस्थितिलाई वेवास्ता गरेर माथि बाट कुनै पनि निर्णय नलादिने उहाँले स्पष्ट पार्नुभयो । उहाँले भन्नुभयो – ‘हाम्रो पार्टी सभापति लाद्न चाहानुहुन्छ भनेर जर्बजस्ती एउटा न्यारेटिभ पब्लिकमा पठाउने प्रयास भइराखेको छ । त्यो गलत कुरा हो । कुनै लाद्ने कुरा पनि भएको छैन । छलफल त भर्खर भइराख्या छ । जे परिस्थिति छ, तलको इनपुटको आधारमा निर्णय गर्ने भन्दाभन्दै पहिला नै पार्टी सभापतिले यस्तो गर्न चाहानुभएको थियो, हामीले त्यो कुरा हुनुुहुन्न भनेर यस्तो निर्णय गरिदियौँ भन्नका लागि यो कुराहरु आइराखको छ कि मैले बुझ्या छैन । त्यसकारण पार्टी सभापति स्पष्ट हुनुहुन्छ कि, जहाँ हाम्रो आवश्यकता छ ।
पार्टीलाई फाइदा कसरी हुन्छ भन्ने कुरो हो । निर्वाचनमा जाने भनेको बढीभन्दा बढी सिट कसरी जित्ने भन्ने हो । त्यो गठबन्धन गरेर जितिन्छ, गठबन्धन हुन्छ । गठबन्धन नगर्दा हुन्छ, गठबन्धन हुँदैन । ठाउँपिच्छे फरक–फरक परिवेश छ । सबै ठाउँमा एउटै सिद्धान्त लागु हुँदैन । पार्टी सभापतिले चाहीँ यसरी लाद्नुहुँदैछ, उहाँले लाद्ने कुरा कहाँ गर्नुभाछ ? केन्द्रीय समिति बैठक बसिराछ । त्यहाँबाट निर्णय हुन्छ । केन्द्रीय समितिको निर्णय लाद्या हुन्छ । केन्द्रीय समितिको निर्णय बिना पार्टी सभापति एक्लै जानुहुन्छ ? केन्द्रीय समितिले त्यहाँको वस्तुस्थिति वेवास्ता गरेर निर्णय गर्छ ? गर्दैन । जे कुरा सम्प्रेषित गर्न कोसिस भइराखेको छ, म स्पष्ट ढंगबाट के भन्न चाहान्छु भने त्यो पार्टीको आधिकारिक दृष्टिकोण पनि होइन, र पार्टी सभापतिले लादेर काम कहिल्यैपनि गर्नु भाछैन । आजको दिनमा पनि गर्नुहुन्न । भोलिको दिनमा पनि गर्नुहुन्न । जे निर्णय हुन्छ यहाँबाट सर्वसम्मत् निर्णय हुन्छ ।’
बैठकमा बोल्ने केन्द्रीय कमिटी सदस्यहरुले घर–घर जाऔँ, कांग्रेस जिताऔँ अभियानको सम्बन्धमा र सम्बन्धित जिल्लाको तल्लो तहसम्मको पार्टी संगठनको अवस्थाको बारेमा रिर्पोटिङ गरिरहेको उहाँले बताउनुभयो । प्रवक्ता महतले नेपाल विद्यार्थी संघमा अध्यक्ष तोकिएको विषयलाई विवादित भनेर सम्प्रेषण गर्नु आवश्यक नरहेको बताउनुभयो । पार्टी सभापति देउवाले पार्टीसँग सरसल्लाह र सुझाव लिएरै निर्णय गर्नुभएको उहाँले बताउनुभयो ।
