काठमाडौँ । बतास समूहले सरकारी टोलीलाई पशुपति धर्मशालामा प्रवेश गर्न रोकेको छ । सो समूहले पशुपति धर्मशालामा होटल सञ्चालन गर्दै आएको छ । बतासले सरकारी टोलीलाई धर्मशालाको गेटमै रोकेको हो ।
धर्मशाला परिसरभित्र प्रवेश गर्न खोज्दा बतास समूहका प्रतिनिधिले गेट लगाइदिएपछि सरकारी टोली गेटबाहिरै रोकिएका थिए ।
सरकारी टोली प्रवेश गर्नेक्रममा दुवै पक्षबीच केहीबेर भनाभनसमेत भएको थियो । कानूनी उपचारको प्रक्रियामा रहेकोले सर्वोच्च अदालतको अन्तिम फैसला कुर्न आग्रह गर्दै बतास समूहका प्रतिनिधिले सरकारी टोलीलाई परिसर प्रवेश गर्न रोकेका थिए ।
तर सरकारी टोली आफ्नो सम्पत्ति हेर्न पाउनु पर्ने भन्दै परिसरभित्र प्रवेश गर्न खोजेका थिए ।
पशुपति क्षेत्र विकास कोषले सम्झौताअनुसार काम नभएको भन्दै यही चैत १७ गते बतास समूहले गौशालास्थित पशुपति धर्मशाला भवनमा सञ्चालन गरेको होटल आनन्द प्रालिसँगको सम्झौता भङ्ग गर्ने निर्णय गरेको थियो ।
तर कोषले सम्झौता भङ्ग भएको भनी जानकारीसहितको पठाएको पत्र बतास समूहले लिन मानेको थिएन । पत्र लिन नमानेपछि कोषले सोमबार सार्वजनिक सूचना निकाल्दै होटल आनन्द सञ्चालन गरिएको पशुपति धर्मशाला खाली गर्न र धर्मशालाभित्र रहेका सामान निकाल्न भनेको थियो ।
बतास समूहले अहिलेसम्म भवन खाली गरेको छैन । त्यसपछि सरकारी टोली शुक्रबार होटलमा ताला लाउन आएको भन्दै बतास समूहले गेटबाट प्रवेश गर्नै नदिएको हो ।
