हेटौंडा । राप्रपा नेपालका महामन्त्री राजाराम बर्तौलाले ज्ञानेन्द्र कै भुमिकाको कारण अब नेपालमा राजा नफर्किने बताउनु भएको छ । आज राप्रपा नेपाल मकवानपुरद्वारा हेटौंडामा आयोजित कार्यक्रममा बोल्दै बर्तौलाले अभिभावक बन्नु पर्ने राजा एउटा दल भित्र पनि गुट, समूह, ब्यक्ति खोज्दै हिड्न थालेपछी सक्रिय राजा बन्ने सपना अब सदाको लागि समाप्त भएको बताउनु भयो ।
हामिले मुलुक भित्रका सबै दल र शक्तिले स्वीकार्ने सेरेमोनियल राजाको कुरा गर्दा उनले अस्थिरता र अराजकता मार्फत सक्रिय राजाको भुमिकामा आउने रहर गरेपछी राजा कै एजेन्डा छोड्न बाध्य भएको समेत बर्तौलाले बताउनुभयो । राप्रपा र कमल थापालाई कमजोर बनाउने खेलमा निर्मल निवास प्रयोग भएको भन्दै बर्तौलाले आक्रोश समेत पोख्नुभयो ।
अहिले पनि राप्रपा नेपाल र कमल थापालाई राजनैतिक रुपमा समाप्त पार्ने षड्यन्त्र जारी रहेकोे भन्दै त्यो दिवास्वप्न मात्र हुने उहाँको दाबी थियो । कार्यक्रममा राप्रपा नेपालका नेताहरु बालकृष्ण कार्की , अम्बिका ढुंगाना , गुरु सापकोटा लगायतले बोलेका थिय ।
