काठमाडौं ।सगरमाथा अक्सिजन ग्याँस प्लान्टमा बिस्फोट हुँदा एक जनाको ज्यान गएको छ भने ७ जना घाईते भएका छन् । बिहीवार ललितपुर महानगरपालिका–१५ मा रहेको औद्योगिक क्षेत्रस्थित बिहान १०ः०५ बजे सगरमाथा अक्सिजन नेपाल प्रा.लि.मा अक्सिजन सिलिण्डर भर्ने क्रममा ग्यास लिक भइ पड्किँदा ब्रिजमोहन महतोको ज्यान गएको हो भने अन्य ७ जना घाइते भएका हुन् । मृतक ब्रिजमोहन महतोको शरीर क्षतविक्षत भएको ललितपुर प्रहरी परिसर प्रवक्ता एसपी सिद्धिविक्रम शाहले बताउनु भयो ।
घाईतेमध्ये एकजनाको अवस्था गम्भीर रहेको र उहाँको बि एण्ड बी अस्पतालमा उपचार भइरहेको ललितपुर प्रहरीका प्रवक्ता शाहले जानकारी दिनुभयो ।
उहाँका अनुसार घाईते एक जनाको अवस्था गम्भीर छ भने उहाँको एउटा खुट्टा छिनको छ । अन्य घाईतेको पाटन अस्पतालमा उपचार भइरहेको उहाँले बताउनु भयो । अहिले घटनास्थलमा नेपाल प्रहरीको विपद् व्यवस्थापन टिमले शुरुवाती अनुसन्धान गरिरहेको र शुरुवाती अनुसन्धानपछि यसको विस्तृत अनुसन्धान हुने एसपी शाहले बताउनु भयो ।
प्रवक्ता शाहले भन्नुभयो, ‘ललितपुरको पाटन औद्योगिक क्षेत्रमा अक्सिजन प्लान्ट बिस्फोट भएको हो । १०ः०५ देखि १०ः १० बजेको बीचमा रहेको छ । अक्सिजन रिफिलको काममा बिस्फोट भएको देखिन्छ । अक्सिजन भर्ने क्रममा सिलिण्डर बिस्फोट भएको हो । सिलिण्डर भर्ने क्रममा रहनुभएका ब्रिज महतोको बिस्फोटबाट छतविक्षत भएर मृत्यु भएको छ । अन्य ७ जना घाइते भएका छन्, ६ जनाको पाटन, अर्कोको बि एण्ड बीमा अहिले उपचार भइरहेको छ । घरहरुको क्षति भएको छ, सिसा फुटेको छ, मृतकका पार्टहरु धेरै टाढा टाढासम्म पुगेको छ, यो टेक्निीकल्ली कारण हो । अब अनुसन्धानपछि सबै थाहा हुन्छ । बिस्फोट भएका कारण घटना भएको हो । आगलागी भएको छैन । क्षति अहिले नै यकिन गर्न सकिँदैन । कति भयो अनुसन्धानपछि थाहा हुन्छ रिफिलिङगको क्रममा टेक्निकल्ली मिस्टेक भएर बिस्फोट भयो प्लान्टमा नै क्षति पुगेको छ । अहिले नेपाल पुलिसको विपद् व्यवस्थापनको टिम आएको छ । उहाँहरुले भित्र केही असहज छ कि भन्ने अनुसन्धान गरेपछि हामी थप अनुसन्धान गर्नेछौँ । छिमेकको घरहरुमा पनि सिसा फुटेको छ ।’
त्यस्तै दुर्घटनास्थलको निरिक्षणका लागि पुग्नुभएका उद्योग, वाणिज्य तथा आपूर्ति मन्त्री दिलेन्द्रप्रसाद बडूले मृतकको परिवारले पाउने राहत सरकारले तत्काल दिने बताउनु भयो । उहाँले अन्य घाईतेलाई सरकारले उपचार गर्ने पनि प्रतिवद्धता जनाउनु भयो । मन्त्री बडूले अक्सिजन भर्ने क्रममा यसरी बिस्फोट हुनु साधारण नभएको भन्दै यसलाई गहन अनुसन्धान गर्ने बताउनु भयो । उहाँले सरकारले यो विषयलाई प्राथमिकताका साथ राखेर प्राविधिकहरुलाई बोलाएर नै अनुसन्धान गर्ने बताउनु भयो ।
मन्त्री बडूले भन्नुभयो, ‘यो जुन घटना भयो यो दुख्द्, दुर्भाग्यपूर्ण । सबैलाई दुःख लागेको छ । हामीले सहजै अनुमान लगाउन सक्दैनौँँ । यो टेक्नीकल्ली अवस्थाका कारण भएको भन्ने कुरा छ । अक्सिजन रिफिलिंग गर्दा बिस्फोट हुनु भनेको झनै खोजको विषय हो । यसलाई हामी अनुसन्धान गर्नेछौँ । यो पहिलो उदाहरण हो भन्ने खबर छ । यसलाई हामी गहन विषय बनाएर अनुसन्धान गर्नेछौँ । घाईतेहरुको स्वास्थ्यलाभको कामना । उनीहरुको उपचारमा हामी लाग्छौँ । प्राविधिकहरुसमेत राखेर अनुसन्धान गर्नेछौँ । सरकारले निःशुल्क उपचार गराउनेछौँ । सरकारले गर्नुपर्ने सहयोग गर्नेछ । हामीले मृतकले पाउने क्षतिपूर्ति दिनेछौँ । अक्सिजनको सिलिण्डरबाट यस्तो बिस्फोट हुनसक्छ भन्ने कुरा सामान्य भन्दा धेरै फरक कुरा छ । खोजको विषय यसलाई बनाएर अनुसन्धान गर्नेछौँ ।’
मन्त्री बडूले घाईतेहरु सबैले तत्काल उपचार पाउनुपर्ने र यस बारेमा सरकारले आफ्नो कर्तव्य पूरा गर्ने बताउनुभयो ।
