काठमाडौं । अमेरिकी धनाढ्य एलन मस्कले अन्ततः ४४ अर्ब अमेरिकी डलरमा लोकप्रिय सामाजिक संजाल ट्वीटर किनेका छन् । मस्कले ट्वीटर किन्दैछन् भन्ने हल्लाबीच ट्वीटरको बोर्डले मस्कले दिएको अफरलाई स्वीकार गरेको हो ।
अमेरिकी शेयर बजारमा पनि केही दिनदेखि ट्वीटरको शेयर मूल्य बढ्दै गएको थियो ।
ट्वीटर अहिले समकालीन विश्वमा सबैभन्दा ठूलो सोसल मिडिया (सामाजिक संजाल) मध्ये एक हो ।
मस्कले केही दिन अगाडि मात्र ट्वीटरको ९ प्रतिशत शेयर किनेका थिए । उनले ट्वीटर कम्पनी ५४.२० डलर प्रति शेयरको दरले कम्पनी खरिद गरेको बताएका छन् । केही दिन अघि ट्वीटर किन्ने मस्कको सार्वजनिक अभिव्यक्तिलाई ट्वीटरको बोर्डले खण्डन गरेको थियो ।
स्पेस एक्स अन्तरिक्ष कार्यक्रम, टेस्ला कार तथा सूचना प्रविधिमा अथाह लगानी गरी राम्रो प्रतिफल निकाल्न सफल उद्यमी मस्क विश्वमै नवीन वैज्ञानिक उपक्रमहरुको सफल प्रयोगका लागि चर्चित छन् । उनी विश्वकै धनीमध्येका एक व्यक्ति हुन् । फोब्र्स म्यागाजिनका अनुसार, उनीसँग २७४ अर्ब अमेरिकी डलर बराबरको खुद सम्पत्ति छ ।
ट्वीटर कम्पनीका नयाँ मालिक एलन मस्कले वाक स्वतन्त्रता लोकतन्त्रको मुख्य अधिकार भएको उल्लेख गर्दै यसमा नयाँ सुविधा थपेर पहिलेभन्दा राम्रो बनाउन कोसिस गर्ने बताएका छन् । उनले ट्वीटरका फेक अकाउन्ट हटाउनेदेखि कन्टेन्टका अवरोधहरु हटाउने प्रतिबद्धता जनाएका छन् ।
ट्वीटरलाई वाक स्वतन्त्रताका लागि निकै उत्कृष्ट प्लेटफर्मका रुपमा लिइन्छ । तर यो प्लेटफर्म विवादमुक्त भने छैन । अमेरिकी पूर्व राष्ट्रपति डोनाल्ड ट्रम्पले ट्वीटरलाई हिंसा भड्काउन दुरुपयोग गरेको भन्दै ट्वीटरले उनको अकाउन्ट नै बन्द गरिदिएको थियो । अहिले मस्कले ट्वीटर किनेपछि त्यो बहस फेरि शुरु भएको छ ।
ट्रम्पका समर्थकहरुले एलन मस्कले ट्रम्पको अकाउन्ट फेरि खोल्न मद्दत गर्नु पर्ने बताएका छन् । तर ट्रम्प स्वयंले भने कसैसँग अनुरोध नगरेको बताएका छन् ।
🚀💫♥️ Yesss!!! ♥️💫🚀 pic.twitter.com/0T9HzUHuh6
— Elon Musk (@elonmusk) April 25, 2022
