एजेन्सी । रियल मड्रिडले यो सिजनको स्पेनिस फुटबल लिग ला लिगाको उपाधि जितेको छ ।
शनिबार राति भएको खेलमा घरेलु मैदानमा स्पान्योललाई ४–० गोलले पराजित गरेपछि रियल चार खेल बाँकी छँदै च्याम्पियन बन्न सफल भएको हो ।
स्पान्योलविरुद्ध घरेलु टोलीको जितमा ब्राजिली युवा स्टार रोड्रिगोले दुई तथा मार्को एसेन्सियो र करिम बेन्जेमाले एक–एक गोल गरे ।
३३औं मिनेटमा रोड्रिगोले कप्तान मार्सेलोको पासमा गोल गर्दै घरेलु टोलीलाई सुरुवाती अग्रता दिलाए । ४३औं मिनेटमा रोड्रिगोले व्यक्तिगत तथा टोलीका लागि दोस्रो गोल गर्दै रियलको अग्रता दोब्बर पारे ।
५५औं मिनेटमा मार्को एसेन्सियोले कामाभिंगाको पासमा गोल गर्दै रियललाई ३–० को स्थितीमा पुर्याए ।
८१औं मिनेटमा वैकल्पिक खेलाडीको रुपमा मैदान छिरेका फरवार्ड करिम बेन्जेमाले गोल गर्दै रियललाई ४–० को जित दिलाए । बेन्जेमा ६०औं मिनेटमा मारियानो डियाजको स्थानमा मैदान छिरेका हुन् ।
रियलको यो समग्रमा ३५औं ला लिगा उपाधि हो । रियलले पछिल्लोपटक २०१९–२० को सिजनमा उपाधि जितेको थियो ।
