गुल्मी। गुल्मी दरबार गाँउपालिका गुल्मीमा अध्यक्ष र उपाध्यक्ष सहित चार वटा वडामा नेपाली कांग्रेस विजयी भएको छ । पालिका अध्यक्षमा सरोज थापा र उपाध्यक्षमा तारा थापा ढेगा विजयी हुनु भएको हो । नेकपा एमालेले तीन वटा वडामा विजयी हासिल गरेको छ ।
कांग्रेसबाट पालिका अध्यक्ष र उपाध्यक्ष विजयी हुंंदा एमालेबाट अध्यक्षका उम्मेदवार कृष्ण प्रसाद भुसाल र उपाध्यक्षका उम्मेदवार शुसिल पुन पराजित हुनु भएको हो । भुसाल र पुन गत स्थानिय निर्वाचनमा समेत पराजित हुनु भएको थियो । २०७४ को निर्वाचनमा समेत कांग्रेस चार वटा वडा सहित पालिका अध्यक्ष र उपाध्यक्षमा विजयी भएको थियो ।
कांग्रेसबाट पालिका अध्यक्ष निर्वाचित थापाले ६१६६ मत ल्याउदा एमालेका भुसालले ५६०२ मत पाउनु भएको थियो । थापाले भुसाललाई ५६४ मत अन्तरले पराजित गर्नु भएको छ । कांग्रेसबाट पालिका उपाध्यक्ष विजयी ढेंगाले ६१८८ मत ल्याउदा पुनले ५५८९ मत पाउनु भएको निर्वाचन अधिकृतको कार्यालयका प्रकाश थापाले जानकारी गराउनुभयो । थापाले पुनलाई ५९९ मत अन्तरले पछाडी पार्नु भएको छ । यस पालिकामा कांग्रेस र एमाले दुवै पार्टीले किल्ला जोगाउने र भत्काउने दाउमा थिए । कांग्रेसले आफ्नो किल्ला जोगाउन सफल भएको छ । एमालेको पालिका पल्टाउने रणनीति सफल हुन सकेन ।
वडा नं. १ मा नेपाली कांग्रेसका राजेन्द्र प्रसाद कडेल विजयी हुनु भएको छ । यस वडामा गत निर्वाचनमा एमाले विजयी भएको थियो । वडा नं. २ मा एमालेबाट विष्णु प्रसाद गौतम विजयी हुनु भएको छ । गत निर्वाचनमा यस वडामा एमाले नै विजयी भएको थियो । वडा नं. ३ कांग्रेसका राम बहादुर थापा विजयी हुनु भएको छ । गत निर्वाचनमा यस वडा कांग्रेसले नै जितेको थियो ।
वडा नं. ४ मा एमालेबाट देविराम (बावुराम) पोखरेल विजयी हुनु भएको छ । यस वडामा गत निर्वाचनमा एमाले नै विजयी भएकाे थियो । वडा नं. ५ मा एमालेबाट गुणानिधी पौडेल विजयी हुनु भएको छ । गत निर्वाचनमा यस वडामा कांग्रेस विजयी भएको थियो ।
वडा नंं ६ मा कांग्रेसबाट मुकेश थापा विजयी हुनु भएको छ । गत निर्वाचनमा कांग्रेस नै विजयी भएको थियो । वडा नं.७ मा कांग्रेसबाट शालिकराम टण्डन विजयी हुनु भएको छ । गत निर्वाचन पनि यस वडामा कांग्रेस नै विजयी भएको थियो ।
