काठमाडौ । देशमा सुशासनको नमूना हेर्न यातायात कार्यालय पुगे हुन्छ । जुगले धेरै चोला फेर्यो धेरै क्षेत्रमा । तर यातायात कार्यालयमा भने अहिले पनि सुशासन ढुंगे युगमै छ । यहाँ ढुंगे युगको प्रतिनिधित्व ढुंगाले नै गरेको छ । पुसको चिसो बिहान घाम पनि नउदाउँदै नागरिकहरु राज्यलाई कर बुझाउनका लागि घण्टौँ कार्यलय अगाडी प्रतिकात्मक लाईनमा बस्छन् । सवारी साधन नविकरण गर्नको लागी स्वयम्भुको सानो भर्याङ्गमा रहेको यातायात कार्यलयमा सेवा लिन जानेहरुले लाइन बस्नुपर्ने समयको कुनै ठेगान नै छैन । घण्टौँ लाग्छ सानो काम लिन पनि कतिपय बेला त यहाँका नागरिक कार्यालय नखुल्दै होइन कि बिहान उज्यालो नहुदै यहाँ पुगेर लाइन बस्ने गरेका छन् ।
तर अहिले त्यसरी लाइनै बसेर पनि नपुग्ने भएको छ । अब यहाँ लाइन बस्न पनि नसक्ने अवस्था भएपछि आफ्नो पालो ढुंगा राखेर कुर्ने गरिएको छ ।
सेवाग्राहीले ढुंगाले च्यापेर कुनै कागजको टुक्रा राखेका छन् र त्यसैलाई पालो भुइँमै राखिएको छ । यो देख्दा लाग्छ यहाँ काम हुदैन अर्थात् सेवाग्राहीले नियमअनुसार सेवा पाउँदैनन् कि मानिस ढुंगेयुगमा जस्तो हालत छ । यसैले अन्यत्र आएपनि यहाँ लोकतन्त्र, गणतन्त्र केही आएको छैन ।
फेरि आम नागरिक आफ्नो काम लिन यहाँ पुगेका होइनन् कि राज्यलाई कर तिर्न पुगेका छन् । राज्यले आफैले कर उठाउनुपर्नेमा यसरी कर तिर्न कार्यालयमै पुगेका नागरिक पनि समयमा कर बुझाउन नपाएर यो हालत देखिन्छन् ।
यो फेरि कुनै नौलो घटना पनि होइन । यो वर्षैंदेखिको हालत हो । नागरिकले यसका लागि धेरै गुनासो पोखेका छन्, धेरै अनुनय विनय गरेका छन् । तर अहँ, नागरिकको यो गुनासो यातायातको ढुंगे युगमा कुनै सुनुवाई नै हुदैन, भएको छैन । यहाँ देखिएका ढुंगाले थिचिएका कागजहरु नागरिकका लाइन हुन् । बिहान सबेरै त्यहाँ पुगेका नागरिक जाडोमा लामो समय लाइन बस्न नसकेपछि ढुंगाले थिचेर आफ्नो नामको पालो कुराएर उनीहरु कतै बसिरहेका छन् ।
निर्लज्जताको पराकाष्ठा भनेको यही हो । यो एक्काइसौँ सताब्दिमा ढुंगे युगका उदाहरण खोज्न कतै जानै पर्दैन । राज्यलाई कर बुझाउन यातायात कार्यलयमा पुगे हुन्छ, जो कोहीले पनि देख्छ ।
