काठमाडौँ । स्पेनिस फुटबल लिग ला लिगामा रियल मड्रिडले सहज जित निकालेको छ । गएराति भएको खेलमा रियलले स्पान्योललाई ४–१ गोलले हराएको हो ।
घरेलु टोलिलाई फराकिलो जित दिलाउन ड्यानी कार्भाहाल, रोड्रिगो, भिनिसियस जुनियर र किलियन एम्बाप्पे (पेनाल्टी)ले एक–एक गोल गरे । यता, रियलकै गोलकिपर कोर्तुआले आत्मघाती गोल गरेपछि स्पान्योलले एक गोल पाएको थियो ।
५४ औं मिनेटमा जोफ्रे कारेरासले क्रस गरेको बल कोर्तुआको खुट्टामा लागेर गोलमा परिणत भएको थियो । यसै गोलबाट स्पान्योलले सुरुवाती अग्रता बनाएको थियो ।
तर, ५८ औं मिनेटमा कार्भाहाल, ७५ औं मिनेटमा रोड्रिगो, ७८ औं मिनेटमा भिनिसियस र ९० औं मिनेटमा पेनाल्टीमार्फत एम्बाप्पेले गोल गर्दै रियललाई जित दिलाए ।
जितसँगै रियल ६ खेलबाट १४ अंकका साथ तालिकाको दोस्रो स्थानमा छ भने स्पान्योल ७ अंकका साथ १३ औं स्थानमा छ ।
