काठमाडौँ । इंग्लिस क्लब म्यान्चेस्टर युनाईटेडले पोर्चुगाली प्रशिक्षक रुबेन अमोरिमलाई बर्खास्त गरेको छ। बुधबार हुने प्रिमियर लिग खेलमा बर्नलीविरुद्ध ड्यारेन फ्लेचरले अन्तरिम रूपमा टोली सम्हाल्ने भएका छन्।
यो निर्णय सो क्लबले हिजो भएको लिड्स युनाईटेडसँग १–१ को बराबरी खेलपछि गरिएको भनिएको छ, जहाँ अमोरिमले खेलपछि आफ्नो निराशा खुल्ला रूपमा अभिव्यक्त गरेका थिए।
लामो समयदेखि युनाइटेडको खराब प्रदर्शन र परिणामहरूको निरन्तर निराशाजनक स्थितिले उनी बर्खास्तीमा परेका हुन्।
४० वर्षीय अमोरिम नोभेम्बर २०२४ मा नियुक्त भएका थिए। अमोरिमको अनुबन्ध जुन २०२७ सम्मको रहेपनि क्लबले टोलीलाई नयाँ दिशा दिन यो कदम चाल्न बाध्य भएको बुझिएको छ।
हाल क्लबले अस्थायी व्यवस्थापकीय जिम्मेवारी कसलाई दिनेछ र स्थायी मौका कसलाई दिनेछ भन्नेबारे थप घोषणा बाँकी छ। यो निर्णयले प्रिमियर लिग र युनाइटेड समर्थकहरूकोबीच ठूलो चर्चा र प्रतिक्रियाहरू उत्पन्न गरेको छ।
प्रिमियर लिगमा युनाइटेड २० खेलमा ३१ अंक जोडेर छैटौं स्थानमा छ । टोलिले पछिल्ला पाँच खेलमा एकमात्र जित निकालेको छ भने तीन बराबरी र एक हार ब्यहोरेको छ।
