काठमाडौं । देशले आज नयाँ प्रधानमन्त्री पाएको छ । नेपालका विसं २०४६ मा प्रजातन्त्रको पुनस्र्थापनापछि पहिलो पटक सबैभन्दा कम उमेर, ३६ वर्षीय बालेन्द्र शाह (बालेन) ले आज नेपालको नयाँ प्रधानमन्त्रीका रुपमा शपथ लिने तय भएको हो । सम्भवत उनी नेपाली इतिहासकै सबैभन्दा कम उमेरका जननिर्वाचित प्रधानमन्त्रीका रुपमा पनि परिचित हुनेछन् ।
आज मध्याह्न राष्ट्रपति कार्यालय शीतल निवासमा राष्ट्रपति रामचन्द्र पौडेलले उनलाई बालेनलाई प्रधानमन्त्री पदको शपथ गराउने कार्यक्रम छ । उनी राष्ट्रिय स्वतन्त्र पार्टी, रास्वपा वरिष्ठ नेता हुन् । सो पार्टीले यही फागुन २१ मा सम्पन्न निर्वाचनमा झण्डै दुई तिहाई बहुमत हासिल गरेको छ ।
शपथ ग्रहण समारोह दिउँसो १२ः३४ बजेका लागि तय भएको हो । यो समय ज्योतिषीय गणनाअनुसार शुभ साइतका रुपमा मिलाइएको हो । साथै शपथका क्रममा त्यहाँ शंखध्वनि, बौद्ध गुरुहरुको मन्त्रोच्चारणको पनि व्यवस्था मिलाइएको छ ।
बालेनले दिउँसो सवा २ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा पद बहाली गर्नेछन् । यो समय पनि साइत हेरेर मिलाइएको छ । साथै सिंहदरबारमा प्रधानमन्त्री बस्ने कुर्सी पनि बास्तुशास्त्रीय विधि अनुसार हिजो नै मिलाइएको बताइएको छ ।
प्रधानमन्त्री पदको शपथ ग्रहण समारोहमा ७ वटा शंखबाट शखनाथ हुने, १०८ जना बटुकबाट स्वस्ती शान्ति वाचन गर्ने र १६ जना बौद्ध भिक्षुबाट अष्ठमंगल पाठ गर्ने तयारी पनि रहेको बताइएको छ ।
यसैबीच आजको शपथ ग्रहण समारोहको अर्काे एक नयाँ विशेषता पनि रहेको छ कि उनले उत्तरतर्फ फर्केर शपथ लिनेछन् । जस्तो कि यसअघिका प्रधानमन्त्रीहरु सबैलाई दक्षिण फर्काएर शपथ गराउने गरिएको थियो, तर यसपालि भने उनलाई उत्तर फर्काएर शपथ गराइने छ ।
सोही बमोजिम हिजो रातिसम्म शीतल निवासको शपथ समारोहको व्यवस्थापन गरिएको बताइएको छ । ज्यातिषीय परामर्श अनुसार दक्षिण फर्केर शपथ लिनु शुभ नहुने भन्दै यो दिशा तय गरिएको हो ।
