काठमाडौं । प्रतिनिधि सभाका ज्येष्ठ सदस्य अर्जुननरसिंह केसीले जनताले सरकार परिवर्तनसँगै शासन सञ्चालनको संस्कृति र कार्यशैलीमा पनि आमूल परिवर्तनको अपेक्षा गरेको बताउनुभएको छ ।
विहीबार प्रतिनिधि सभाको पहिलो बैठकलाई सम्बोधन गर्दै उहाँले वर्तमान सरकार र संसदप्रति जनतामा ठूलो आशा, विश्वास र उत्सुकता रहेको उल्लेख गर्नुभयो । उहाँले ताजा जनादेशबाट गठित प्रतिनिधि सभालाई जनताले जिम्मेवारीपूर्वक हेरेको भन्दै जनअपेक्षाअनुसार काम गर्नुपर्ने आवश्यकता औँल्याउनुभयो ।
उहाँले मन्त्रीपरिषद्ले हालै सार्वजनिक गरेको १०० बुँदे शासन सुधार कार्यसूची सकारात्मक रहेको बताउँदै त्यसको प्रभावकारी कार्यान्वयनका लागि समय, समर्पण र निष्पक्षता अपरिहार्य हुने धारणा राख्नुभयो ।
संविधानको समावेशी, समानतामूलक र जनसर्वोच्चताको मर्मप्रति सबै राजनीतिक शक्ति प्रतिबद्ध हुनुपर्नेमा जोड दिँदै उहाँले विभाजन होइन एकता, उत्तेजना होइन चेतना र आवेग होइन विवेकका साथ राष्ट्रिय आवश्यकताहरू सम्बोधन गर्नुपर्ने बताउनुभयो ।
उहाँले विगतमा पटक–पटक भएको प्रतिनिधिसभा विघटनले राजनीतिक अस्थिरता बढाएको उल्लेख गर्दै त्यसको असर शासन प्रणाली, प्रशासनिक संयन्त्र र समग्र राष्ट्रिय जीवनमा परेको टिप्पणी गर्नुभयो । संवैधानिक संस्थाहरूको निष्पक्षता, स्वायत्तता र पारदर्शितामा समेत चुनौती देखिएको भन्दै उहाँले यस्ता प्रवृत्तिको अन्त्य हुनुपर्ने धारणा व्यक्त गर्नुभयो ।
संसदीय अभ्यासका कमजोरीका कारण नीति निर्माण, कानुन निर्माण र सरकारलाई जनउत्तरदायी बनाउने प्रक्रियामा असर परेको उल्लेख गर्दै अब विकास, अर्थतन्त्र र सुशासनसँग सम्बन्धित विधेयकलाई प्राथमिकताका साथ अघि बढाउनुपर्ने आवश्यकता उहाँले औँल्याउनुभयो ।
उहाँले राजनीतिक अस्थिरता र पुराना प्रवृत्तिबाट वाक्क भएका जनताले नयाँ सरकारसँग नयाँ संस्कार, नयाँ संस्कृति र नयाँ कार्यशैलीको अपेक्षा गरेको बताउँदै सोहीअनुसार काम गर्न सरकारलाई आग्रह गर्नुभयो । साथै, संसदभित्र सभ्य र मर्यादित भाषामा अभिव्यक्ति दिन पनि उहाँले सबैलाई आह्वान गर्नुभयो ।
