भादगाउँ । भक्तपुरको जगातीमा सवारी जाँचका क्रममा प्रहरीले अवैध लागुऔषध ३९६ थानसहित एक युवकलाई पक्राउ गरेको छ ।
बनेपाबाट काठमाडौँतर्फ आउँदै गरेको बा४१प ३१५५ नंको मोटरसाइकल जाँच गर्नेक्रममा प्रहरीले धनकुटाको साँगुरीगढी गाउँपालिका–७ का २४ वर्षीय राजेश राईलाई सोमबार पक्राउ गरी हिजो मङ्गलबार सार्वजनिक गरिएको महानगरीय प्रहरी परिसर भक्तपुरका सूचना अधिकृत प्रहरी नायब उपरीक्षक रेवतीरमण पोखरेलले जानकारी दिनुभयो ।
उहाँका अनुसार राईको साथबाट बुप्रिनोरफिन लुपिजेसिक दुई एमएलको ९८ थान, फेनिरामाइन एभिल दुई एमएलको १०० थान, प्रोमेथाजिन हाइड्रोकोलोराइड फेनरगन दुई एमएलको १०० थान, डाइजेपाम ७२ थान, सिसाको बाहिरी भागमा कुनै पनि लोगो नभएको लागुऔषधजस्तो देखिने २६ थानसहित जम्मा ३९६ थान लागुऔषध बरामद भएको उहाँले बताउनुभयो ।
जगाती नाका हुँदै काठमाडौं भित्रिने र बाहिरिने सवारी जाँच गर्ने क्रममा बनेपाबाट काठमाडौँतर्फ आउँदै गरेको बा४१प ३१५५ नंको मोटरसाइकललाई जाँच गर्ने क्रममा मोटरसाइकलको पछाडि सवार राई कालो रङको झोला बोकी भागेकामा तत्काल नियन्त्रणमा लिई निजले बोकेको झोला खानतलासी गर्दा उक्त झोलाभित्र लुकाइछिपाइ राखेको अवस्थामा लागुऔषध बरामद भएको प्रनाउ पोखरेलले बताउनुभयो ।
