पर्सा । बुधबार बेलुका आएको हावाहुरीका कारण पर्सामा एक जनाको मृत्यु भएको छ । मृत्यु हुनेमा र्साको पकाहा मैनपुर गाउँपालिका १ धोरेकी १५ बर्षकी श्रुति सहनी रहेकी छिन् ।
घर नजिकै रहेको सिमलको रुखको हाँगा भाचिएर उनी घाइते भएकी थिइन् । वीरगञ्ज हेल्थकेयरमा उपचार पछि थप उपचारको लागि नेशनल मेडिकल कलेज वीरगञ्जमा लैजाने क्रममा राति नै मृत्यु भएको जिल्ला प्रहरी कार्यालय पर्साका प्रवक्ता डिएसपी अनन्तराम शर्माले जानकारी दिए ।
हावाहुरीकै कारण लाखौंको धनमालमा क्षति पुगेको छ । जिराभवानी गाउँपालिका ४ को मोटरसाइकल ग्यारेज र खाजा घर समेत गरी ४ वटा घरको छाना उडाएको छ ।
हावाहुरीले पोखरीया बजार चौकमा ३ वटा बिजुलीको पोल ढालेका कारण त्यस क्षेत्रको विद्युत सेवा अवरुद्ध छ ।
हुरीले वीरगन्ज महानगरपालिका वडा नम्बर १८ भवानीपुरमा ७ वटा घरमा क्षति पुर्याएको वडा प्रहरी कार्यालय श्रीपुरले जनाएको छ। वीरगन्ज महानगरपालिका वडा नम्बर १८ भवानीपुरका जमदार देवान, विजय पटेल, श्रवण महतो लगायत सात जनाको घरमा हावाहुरीले क्षति पुर्याएको प्रहरीले बताएको छ।
हुरीले पर्साको ग्रामीण भेगमा रहेका करिब आधा दर्जन प्रहरी चौकीहरुमा पनि क्षति पुरयाएको छ। सुपौली, धोरे र भस्वामा रहेको प्रहरी चौकी भवनका छाना हुरीले उडाएको जिल्ल प्रहरी कार्यालय पर्साले जनाएको छ।
यस्तै अमरपट्टीमा रहेको प्रहरी चौकीको भवन र अस्वारीमा रहेको प्रहरी चौकीको मेस भवन हुरीले भत्किएको पर्साका प्रहरी नायव उपरीक्षक अनन्तराम शर्माले जानकारी दिए।
