काठमाडौँ । शिशुलाई अस्पतालमा बेवारिसे छोडेको आरोपमा पूर्व सभासद गायत्री साह र उनका श्रीमान राजेश महतो पक्राउ परेपछि शिशु अस्पतालको संरक्षणमा राखिएको छ। जिम्मा लिने कोही नभएपछि शिशुलाई ललितपुरको मेडिसिटी अस्पतालले आफ्नै संरक्षणमा राखेको हो।
अस्पतालका महाप्रबन्धक विजय रिमालका अनुसार शिशु स्याहारका लागि चार नर्स छुट्याइएको छ। उनले भने ‘बच्चालाई दुध खुवाउने, सुताउने सबै जिम्मा उनीहरुलाई दिएका छौँ।’ शिशुको अवस्था सामान्य भएकाले घर लैजान सकिने उनले बताए।
सञ्चारमाध्यममा शिशु छोडेर भागेको समाचार आउन थालेपछि भने पूर्व सभासद साह केही दिन अस्पताल आएर हेर्न थालेकी थिइन्। रिमालले भने, ‘बच्चा डाउन सिन्ड्रोम अबस्थाको जन्मिनुमा अस्पताललाई दोषी देखाएर क्षतिपुर्तीबापत मोटो रकम मागेका थिए,’ रिमालले भने, ‘हामीले पैसा दिन नमानेपछि उनीहरु बच्चा लिन आएनन्।’
आइतबार साह दम्पतीलाई प्रहरीले पक्राउ गरी थुनामा राखेर अनुसन्धान सुरु गरेको छ। अदालतको निर्णय नआएसम्म शिशुलाई अस्पतालकै संरक्षणमा राखिने रिमालले बताए। यो समाचार आजको कान्तिपुर दैनिकमा छ ।
