काठमाडौ। भारतको भ्रमणमा रहनु भएका प्रधान सेनापति प्रभुराम शर्माले दिल्लीमा रहेको राष्ट्रिय समर स्मारकमा शहीदहरूप्रति श्रद्धाञ्जलि अर्पण गर्नु भएको छ । प्रधानसेनापति शर्मा भारतको चार दिवसीय औपचारिक भ्रमणका लागि मंगलबार बिहान नयाँ दिल्ली प्रस्थान गर्नुभएको हो ।
भारतका स्थल सेनाध्यक्ष जनरल एमएम नरवणेको औपचारिक निमन्त्रणामा भारत भ्रमणमा जानु भएको हो । प्रधानसेनापतिको नियुक्ति भएपछिको उहाँको यो पहिलो विदेश भ्रमण हो । प्रधानसेनापति शर्मालाई भारतका राष्ट्रपति रामनाथ कोविन्दबाट भारतीय स्थल सेनाको मानार्थ महारथी दज्र्यानी चिह्नबाट सुशोभन गर्ने कार्यक्रम रहेको सैनिक जनसम्पर्क तथा सूचना निर्देशनालयले जनाएको छ ।
भ्रमणका क्रममा महारथी शर्माले विभिन्न भारतीय उच्चपदस्थ पदाधिकारीसँग भेटघाट गर्नुहुने छ । उहाँले मंगलबार नै भारतीय रक्षा सचिव अजयकुमार, भारतीय चिफ अफ डिफेन्स स्टाफ जनरल विपीन रावत, भारतीय सेनाध्यक्ष जनरल नरवणे र भारतीय वायु सेनाध्यक्ष एयर चिफ मार्शल भिआर चौधरीसँग समेत भेटघाट गर्नुहुने छ । प्रधानसेनापतिको भ्रमण दल श्रीमती सुनिता शर्मासहित नौ सदस्यीय रहेको छ । प्रधानसेनापति शर्मा यही कात्तिक २६ गते स्वदेश फर्कनु हुनेछ ।
