एजेन्सी । अमेरिकाको टेक्सास राज्यमा मंगलबार दिउँसो दुःखद घटना घटेको छ ।
टेक्सासको युभाल्डेस्थित रोब इलिमेन्टरी स्कूलमा १८ वर्षीय किशोरले गोली चलाउँदा १८ विद्यार्थी र ३ शिक्षकको मृत्यु भएको छ । गोली लागेर १३ बालबालिका, विद्यालयका कर्मचारी र केही प्रहरी पनि घाइते भएका छन् ।
घटनापछि राष्ट्रका नाममा सम्बोधन गर्दै राष्ट्रपति बाइडेनले दुःखद घटना भएको बताएका छन् ।
प्रहरीले आक्रमणकारीलाई मारेको दाबी गरेको छ । उनको पहिचानबारे अहिलेसम्म केही स्पष्ट भएको छैन । टेक्सासको विद्यालयमा भएको गोलीकाण्डको यो घटना सन् २०१२ को कनेक्टिकटमा भएको गोलीकाण्डसँग मिल्दोजुल्दो छ ।
२०१२ डिसेम्बर १४ मा, कनेक्टिकटको न्यूटाउनको स्यान्डी हुक इलिमेन्टरी हाई स्कूलमा एक २० वर्षीय पुरुषले गोली चलाउँदा २६ जनाको मृत्यु भएको थियो, जसमध्ये २० बालबालिका थिए । यो अमेरिकी इतिहासमा सबैभन्दा घातक सामूहिक गोलीबारी मानिन्छ ।
