एजेन्सी । युइएफए नेसन्स लिग अन्तर्गत समूह चरणको खेलमा पोर्चुगल र स्पेनले बराबरी खेलेका छन् ।
पोर्चुगलले एक गोलले पछि परेको अवस्थामा घरेलु टोली स्पेनसँग १–१ गोलको बराबरी खेलेको हो ।
बेनिटो भिल्लामरिन मैदानमा बिहीबार राति भएको खेलमा घरेलु टोली स्पेनका अल्भारो मोराटाले २५ औं मिनेटमा गोल गर्दा पोर्चुगलका रिकार्डो होर्टाले ८२ औं मिनेटमा बराबरी गोल फर्काए ।
यो बराबरीपछि लिग ए ग्रुप बीमा दुवै टोलीले समान एक अंक जोडेका छन् ।
यही समूहको अर्को खेलमा चेक रिपब्लिकले स्वीट्जरल्यान्डलाई २–१ ले पराजित गरेको छ भने चेक समूहमा ३ अंक जोडेर शीर्षस्थानमा रहेको छ । अंकविहीन स्वीट्जरल्यान्ड पुछारमा रहेको छ ।
