काठमाडौँ । प्रधानमन्त्री शेरबहादुर देउवा अन्ततः स्टेट पार्टनरसीप प्रोग्राम (एसपीपी) सम्झौता नगर्ने पक्षमा पुगेको बालुवाटार समाचार स्रोतले जनाएको छ । स्रोतका अनुसार सत्ता गठबन्धनमै संकट आउने देखेपछि प्रधानमन्त्रीले यसपटकका लागि सो सम्झौता नगर्ने पक्षमा पुगेका हुन् ।
प्रधानमन्त्री देउवाले आफ्नो अमेरिका भ्रमणमा एसपीपी सम्झौता गर्ने समाचार आएपछि व्यापक विरोध भएको थियो । अहिले पनि सो विरोध भइरहेको छ । त्यो पनि सत्तारुढ दलभित्रै धेरै विरोध भएपछि प्रधानमन्त्रीले सरकारमाथि नै दखल पर्न जाने आँकलन गरेको बुझिएको छ ।
सत्तारुढ गठबन्धनभित्रै यो रडाको मच्चिएपछि तत्कालका लागि सम्झौता नहुने संकेत बालुवाटारले गरेको समाचार स्रोतले जनायो । यो सम्झौता विगत करिब ८ वर्षदेखि नै चर्चामा रहेको छ । यसअघि मात्र एमसीसी पास गरेको सरकारका प्रधानमन्त्री देउवाले यसै विषयलाई आफ्नो अमेरिका भ्रमणको मुख्य एजेन्डा बनाउने बताइएको थियो । प्रधानमन्त्री र खासमा नेपाली कांग्रेस सो सम्झौता गर्ने तयारीमा नै छ । तर सत्ता सहयात्री वामपन्थी दलहरूबाटै चर्को विरोध भएपछि देउवा हच्केका छन् ।
अबका केही महिनामा नै नेपालमा संसदीय निर्वाचन हुन लागेको छ । यही निर्वाचनको मुखमा कांग्रेसलाई देश विरोधी भनी राष्ट्रवादी मुद्दासँग जोडेर वामपन्थी ध्रुवीकरण हुन सक्ने खतरा देखिएपछि प्रधानमन्त्रीले तत्काल सम्झौता नहुने संकेत गरेको बालुवाटार स्रोतले जनाएको छ ।
यसैबीच आजै यसबारे उठेका आशंका र प्रश्नहरूमा प्रधानमन्त्रीका तर्फबाट संसद्मा मन्त्रीहरूले जवाफ पनि दिने भएका बताइएको छ । उता प्रतिनिधिसभा बैठकमा मंगलबार परराष्ट्रमन्त्री नारायण खड्काले पनि एसपीपी हिन्द–प्रशान्त रणनीतिको हिस्सा नभएको भन्दै सम्झौता हुन सक्ने संकेत गरेका थिए । मन्त्री खड्काको यो जवाफपछि पनि उक्त सम्झौताको झन् विरोध भएको छ ।
यो सम्झौता गर्ने भए सत्ताबाट बाहिरिने चेतावनी अरु राजनीतिक दलले दिएका छन् । माओवादी र नेकपा एकीकृत समाजवादीका नेताहरुले त यसको विरोध सार्वजनिक रुपमै गरेका छन् ।
यो पनि पढ्नुहोस –नेपाल र अमेरिकाबिच सैन्य सम्झौता भएको दाबी असत्य: अमेरिकी दुतावास
