काठमाडौं । आईसीसी पुरुष क्रिकेट विश्वकप लिग टु अन्तर्गतको त्रिदेशीय सिरिजमा नेपालले आज (बुधबार) घरेलु टोली अमेरिकाविरुद्ध खेल्दैछ ।
टेक्सासस्थित मोसा क्रिकेट मैदानमा नेपाल र अमेरिकाबीचको खेल नेपाली समय अनुसार राति ९ः१५ बजे सुरु हुनेछ ।
मंगलबार राति ओमानलाई हराएको नेपाल सिरिजमा लगातार दोस्रो जितको खोजीमा हुनेछ ।
नेपाल अमेरिकालाई हराएर २ अंक जोड्दै सिरिजको सुखद अन्त्य गर्न चाहन्छ । अमेरिका पनि नेपाललाई हराएर सिरिजमा सुखद अन्त्य गर्ने योजनामा हुनेछ ।
सिरिज अन्तर्गत नै यस अघिको भेटमा नेपाल र अमेरिकाबीचको खेल ‘टाइ’ भएको थियो ।
लिग टु को अंक तालिकामा नेपाल पाँचौं स्थानमा रहेको छ । नेपालले १५ खेलमा १५ अंक जोडेको छ । अमेरिका २३ खेलमा २१ अंक जोडेर चौंथो स्थानमा रहेको छ ।
