एजन्सी । युक्रेनमा रुसको आक्रमण शुक्रबार पनि लगातार जारी छ । युक्रेनको राजधानी कीभमा बिहान ७ वटा ठूला विस्फोट गराइएको छ ।
मानिसहरू रातदेखि घर, सबवे, भूमिगत आश्रयमा लुकेर बसेका छन् । खाद्यान्नदेखि दैनिक उपभोग्य वस्तुको अभाव बनेको छ ।
रुसी विदेशमन्त्री सर्गेई लाभरोभले पनि युद्ध अन्त्य हुने आशालाई खारेज गरेका छन् । न्युयोर्क टाइम्ससँगको कुराकानीमा लाभरोभले भने– हामी अब युक्रेनसँगको वार्ताको प्रस्ताव स्वीकार गर्दैनौं । युक्रेनले आत्मसमर्पण गरेको एउटा शर्तमा मात्रै वार्ता हुन सक्छ । उनीहरुका अध्यक्षले अहिलेसम्म झूट मात्र बोलेका छन् ।
प्रधानमन्त्री मोदीले बिहीबार राति रुसी राष्ट्रपति भ्लादिमिर पुटिनसँग फोनमा कुराकानी गरेका थिए । यसपछि शुक्रबार रुसबाट एक बयान आएको थियो जसमा भनिएको छ– संयुक्त राष्ट्र सुरक्षा परिषद्को बैठकमा भारतले हामीलाई साथ दिनेछ भन्ने हामी आशावादी छौं । यदि यहाँ कुनै संकल्प जारी भएमा हामी भारतको साथ र सहयोगको अपेक्षा गर्दछौं ।
यस्तै, बिहीबार राति नै रुसी सेनाले युक्रेनको चेर्नोबिल आणविक उर्जा केन्द्र नजिकै आक्रमण गरेको थियो । यहाँ धेरै विष्फोट पनि भएका छन् । जसका कारण परमाणु संयन्त्रमा विकिरणको मात्रा बढेको बताइएको छ । युक्रेनको आणविक एजेन्सीले यसको पुष्टि गर्दै विकिरणको मात्रा बढेपछि यस क्षेत्रमा बसोबास गर्ने हजारौं मानिस ज्यान जोखिममा परेको उल्लेख गरेको छ ।
युक्रेनी राष्ट्रपति भोलोदिमिर जेलेन्स्कीले रुसी सेना राजधानी कीभमा प्रवेश गरेको दाबी गरेका छन् । यद्यपि रूसी ट्याङ्कहरू कीभबाट ३२ किलोमिटर टाढा छन् । तिनीहरूलाई रोक्न, युक्रेनी सेनाले तीनवटा पुलहरू उडाएको बताइएको छ ।
