काठमाडौं । आज निर्वाचन आयोगले जनता समाजवादी पार्टी (जसपा) आधिकारिकताको विवादबारे निर्णय गर्दैछ । आयोगको निर्णय आउने निश्चित भएसँगै जसपा अध्यक्षद्वय उपेन्द्र यादव र महन्थ ठाकुर समूह छुट्टाछुट्टै बैठक बस्दै अगामी रणनीति तय गर्नमा जुटिरहेका छन् ।
फुटनजिक पुगेको जसपाभित्र अहिले केन्द्रीय कार्यकारिणी समितिका सदस्यहरू तानातानको अवस्थामा रहेका छन् । अहिले हेर्दा ५१ जना सदस्य रहेको कार्यकारिणी समितिमा यादव समूह बलियो देखिन्छ । त्यस्तै केही समयअघिसम्म संसदीय दलमा बलियो रहेको ठाकुर समूह अहिले आएर कमजोर बनेको छ । यादव समूह अहिले कार्यकारिणी समितिका साथै संसदीय दल दुवैतर्फ बहुमतसहित बलियो अवस्थामा देखिएको छ । उपेन्द्र यादव पक्षले आफूनिकट कार्यकारिणी समितिका सदस्य तथा सांसदलाई गोदावरी भिलेज रिसोर्टमा राखेर आइतबार प्रशिक्षण दिएको छ ।
यादव पक्षले आफूहरूसँग कार्यकारिणी समितिका ३३ सदस्य र २१ जना सांसद रहेको दाबी गरेपनि आयोगले जसपा विवाद समाधानका लागि कार्यकारिणी सदस्यको ‘हेड काउन्ट’ अर्थात टाउको गणना गरी आज पार्टी आधिकारिकताको निर्णय गर्ने तयारी गरेको हो ।
