काठमाडौँ । नेपाल राष्ट्र बैंकले सिमेन्ट, क्लिङ्करलगायत सामग्री निर्यात गर्दा अनुदान दिने प्रक्रियालाई अगाडि बनाउने निर्देशन दिएको छ ।
निर्यातमा अनुदानसम्बन्धी (दोस्रो संशोधन) कार्यविधि, २०७९ अनुसार ती सामग्री निर्यात गर्न केन्द्रीय बैंकले त्यस्तो निर्देशन दिएको हो । उक्त कार्यविधि नेपाल सरकारले संशोधन गरेपछि केन्द्रीय बैंकले सिमेन्ट, डन्डीलगायत सामग्रीको निर्यातमा दिइने अनुदानका लागि सम्बन्धित निकायलाई परिपत्र गरेको छ ।
चालु आर्थिक वर्षको बजेटमा सरकारले थप छ वस्तुको निर्यातमा अनुदान दिने व्यवस्था गरेअनुसार निर्यातमा अनुदान प्रदान गर्ने सम्बन्धी कार्यविधिको दोस्रो संशोधन गर्दै आठ प्रतिशतसम्म अनुदान दिने व्यवस्थालाई मन्त्रिपरिषद्ले स्वीकृत गरेर राजपत्रमा समेत प्रकाशित भइसकेको छ ।
उक्त कार्यविधिमा निर्यात गर्ने उद्योगीले सोधभर्नाबाट निर्यात अनुदान रकम प्राप्त गर्ने व्यवस्था छ । यसअघि कागजात पुर्याएर निवेदन स्वीकृत भएको सात दिनभित्र रकम प्राप्त गर्ने व्यवस्था थियो । संशोधित कार्यविधिअनुसार अब अनुदान रकम पाउन १५ दिन लाग्ने भएको छ । अनुदान भुक्तानीको लागि नेपाल सरकारले राष्ट्र बैंकलाई रकम उपलब्ध गराउनेछ ।
