काठमाडौं । अर्जेन्टिनी मिडफिल्डर एन्जो फर्नान्डेजलाई प्रिमियर लिग क्लब चेल्सीले अनुबन्ध गरेको छ ।
एन्जोलाई चेल्सीले पोर्चुगिज क्लब बेन्फिकाबाट कीर्तिमानी मूल्य १०७ मिलियन पाउण्डमा अनुबन्ध गरेको हो । एन्जोले चेल्सीसँग साढे आठ वर्षको सम्झौता गरेका छन् ।
एन्जोका लागि चेल्सीले खर्चिएको रकम बेलायती क्लबमा हालसम्म कै उच्च रकम बनेको छ । यस अघि म्यानचेस्टर सिटीले २०२१ मा ज्याक ग्रेलिसलाई कीर्तिमानी १०० मिलियन पाउन्डमा अनुबन्ध गरेको थियो ।
कतार विश्वकपमा एन्जोले उत्कृष्ट प्रदर्शन गरेका थिए । अर्जेन्टिनाले विश्वकप जित्दा उनले १ गोल गरेका थिए । साथै, उनी उत्कृष्ट युवा खेलाडीमा चुनिएका थिए ।
