एजेन्सी । फ्रेन्च फुटबल लिग वानमा पेरिस सेन्ट जर्मेन (पीएसजी)ले रोमाञ्चक जित निकालेको छ । आइतबार साँझ भएको खेलमा पीएसजीले लिललाई ४–३ गोलले पराजित गरेको हो ।
घरेलु मैदानमा खेलको ११ औं मिनेटमा केलियन एम्बाप्पेले गोल गर्दै पीएसजीलाई सुरुआती अग्रता दिलाएका थिए । १७ औं मिनेटमा नेयमारले गोल गर्दै पीएसजीलाई २–० को अग्रता दिलाए ।
खेलको २४ औं मिनेटमा बाफोडे डियाकिटेले गोल गर्दै लिललाई २–१ को स्थितिमा ल्याए । यस्तै, जोनाथन डेभिडले ५८ औं मिनेटमा पेनाल्टीबाट गोल गर्दै लिललाई २–२ गोलको बराबरीमा ल्याए ।
रोमाञ्चक बनेको खेलमा ६९ औं मिनेटमा जोनाथन बाबाले गोल गर्दै लिललाई ३–२ को अग्रता दिलाए । यता, खेलको ८७ औं मिनेटमा एम्बाप्पेले व्यक्तिगत दोस्रो तथा टिमका लागि तेस्रो गोल गर्दै पीएसजीलाई ३–३ को बराबरीमा ल्याए ।
त्यसपछि खेलको इन्जुरी समयमा लियोनल मेसीले फ्रिकिक मार्फत उत्कृष्ट गोल गर्दै पीएसजीलाई ४–३ को जित दिलाए । जितसँगै पीएसजी २४ खेलमा ५७ अंकका साथ शीर्ष स्थानमा यथावत रहेको छ । लिल ४१ अंकसहित छैटौं स्थानमा रहेको छ ।
