बनेपा । सञ्चार तथा सूचना प्रविधिमन्त्री रेखा शर्माले सुरक्षण मुद्रण केन्द्र (सेक्युरिटी प्रिन्टिङ प्रेस) बाट चैत मसान्तभित्र अन्त:शुल्क स्टिकर छाप्ने व्यवस्था मिलाउन निर्देशन दिनुभएको छ ।
काभ्रेपलाञ्चोकको पनौती नगरपालिका–५ मा रहेको सुरक्षण मुद्रण केन्द्रको निरीक्षण गर्ने क्रममा उहाँले अर्थ मन्त्रालयबाट आवश्यक बजेट व्यवस्था भइसकेको भन्दै यो वर्षभित्रै काम सुरु गर्ने गरी चैत मसान्तसम्म अन्त:शुल्क छाप्न निर्देशन दिनुभएको हो ।
एक चरणको परिणाम आयो भने बाँकी काम अघि बढाउन आगामी आर्थिक वर्षका लागि आवश्यक बजेट व्यवस्था गर्ने उहाँको भनाइ थियो । उहाँले यसको प्रभावकारिताको आधारमा थप काम अघि बढाइने बताउनुभयो ।
सेक्युरिटी प्रिन्टिङ प्रेसबाट सुरुमा अन्त:शुल्क स्टिकर, दोस्रो चरणमा राहदानी, राष्ट्रिय परिचयपत्र हुँदै केही समयपछि बैंक नोटसमेत छाप्ने योजना रहेको बताइएको छ ।
केन्द्रका कार्यकारी निर्देशक विकल पौडेलले कागजमा आधारित मुद्रण गर्न सकिने अवस्थामा केन्द्र पुगेको जानकारी दिनुभयो ।
सरकारले अब आवश्यक मुद्रण सामग्री ल्याउने र आवश्यक जनशक्तिलाई तालिम दिएर मुद्रण सुरु गर्ने तयारी गरेको छ । प्रेस सञ्चालनमा आएपछि सुरक्षित मुद्रणबापत नेपालबाट वार्षिकरूपमा बाहिरिने रु १० अर्ब जोगिने सरकारले अपेक्षा गरेको छ ।
