एजेन्सी । भारतको इन्दौरस्थित होल्कार स्टेडियममा भएको टेस्टमा अष्ट्रेलियाले भारतलाई ९ विकेटले पराजित गरेको छ । भारतले ७६ रनको लक्ष्य दिएको थियो, जुन अष्ट्रेलियाले खेल सुरु भएको ७६ मिनेटमै पुरा गर्यो । ट्राभिस हेडले ४९ रनको इनिङ खेले ।
यो जितसँगै अष्ट्रेलियाले चार खेलको सिरिजमा २–१ को अग्रता बनाएको छ । सिरिजको अन्तिम खेल मार्च ९ देखि १३ सम्म अहमदाबादको नरेन्द्र मोदी स्टेडियममा हुनेछ ।
खेलको तेस्रो दिन शुक्रबार पाहुना टोलीलाई जितका लागि ७६ रनको सानो लक्ष्य थियो, तर दिनको दोस्रो बलमा रविचन्द्रन आश्विनले उस्मान ख्वाजालाई शून्यमा आउट गरेर भारतीय फ्यानहरूको आशा जगाएका थिए ।
पहिलो ११ ओभरमा भारतीय स्पिनर पनि प्रभावशाली बनेका थिए । तर १२ औं ओभरमा बल परिवर्तन हुनासाथ परिस्थिति बदलियो । बल परिवर्तन गर्नुअघि अष्ट्रेलियाले १३ रन मात्र बनाएको थियो । बल परिवर्तनको ७ ओभरपछि अष्ट्रेलियाका ब्याट्सम्यानले बाँकी ६३ रन बनाए । अश्विनको बलमा मार्नस लाबुसेनले चौका प्रहार गर्दै टोलीलाई जित दिलाए । ट्राभिस हेड ४९ र मार्नस लाबुसेन २८ रनमा अविजित रहे ।
यसअघि भारतले दोस्रो इनिङ्समा १६३ रन बनाएर ७५ रनको अग्रता लिएको थियो । यससँगै अस्ट्रेलियाले आफ्नो पहिलो इनिङ्समा १९७ रन बनाएको थियो भने पहिलो इनिङ्समा ८८ रनको अग्रता लिएको थियो । भारत पहिलो इनिङ्समा १०९ रनमा सिमित भएको थियो ।
