काठमाडौँ । आइसिसी एकदिवसीय विश्वकप छनोटअन्तर्गत समूह ‘बी’ अतर्गतको खेलमा श्रीलंकाले सानदार जित निकालेको छ ।
जिम्बावेको बुलवायो क्रिकेट मैदानमा सम्पन्न खेलमा श्रीलंकाले ओमानलाई १० विकेटले पराजित गरेको हो । ९९ रनको लक्ष्य पछ्याएको श्रीलंकाले १५ ओभरमै लक्ष्य भेट्टायो । श्रीलंकालाई सहज जित दिलाउन दीमुथ करुणाराठेले ५१ बलमा ६१ रन जोडे भने पाथुम निशंकाले ३९ बलमा ३७ रनमा उनलाई साथ दिए । दुवै अविजित रहेका हुन् ।
त्यसअघि ओमान ३० दशमलव दुई ओभरमा सबै विकेट गुमाउँदै ९८ रनमा समेटिएको थियो । ओमानका लागि आयान खानले सर्वाधिक ४१ रन बनाए । यस्तै, जतिन्दर सिंहले २१ तथा फयाज बुटले १३ रन जोड्नुबाहेक अन्य खेलाडीले दोहोरो अङ्कमा रन बनाउन सकेनन् ।
ओमानलाई सस्तैमा समेट्ने क्रममा श्रीलङ्काका वानिन्दु हसरङ्ग एक्लैले पाँच विकेट लिए भने लाहिरु कुमाराले तीन विकेट लिए । त्यस्तै कसुन रजितले एक विकेट झारे ।
