काठमाडौँ । राष्ट्रिय सभा उपाध्यक्ष उर्मिला अर्यालले महिलाहरुलाई पुरुषसरहको अधिकार दिन नसकेसम्म महिलामाथि हुने हिंसा अन्त्य गर्न नसकिने बताउनुभएको छ ।
शुक्रवार संसद भवनमा आयोजित संसदीय प्रभावकारीतामा महिला माननीयहरुको भुमिका विषयक कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले महिलाका पार्टी बाहेकका साझा दायित्वहरु रहेकाले सबै एक भएर महिलाका हक हीतका लागि लड्नुपर्ने बताउनु भयो । उहाँले महिलालाई अधिकार दिलाउने नीति निर्माण गर्न आवश्यक रहेको बताउनु भयो । उहाँले सामाजिक आर्थिक रुपले आधारभुत तहको लैङ्गिक र सामाजिक, जातिय विभेदहरुको अन्त्य नगरेसम्म समुन्नत समाज निर्माण गर्न नसकिने बताउनु भयो ।
उहाँले भन्नुभयो, ‘हामी महिलाको पार्टीगत भन्दा अर्को साझा दायित्वहरु पनि छन् । यसमा हामी सबै मिलेर एकजुट भएर जनताका लागि काम गर्नुपर्छ, महिलाका अधिकारमा काम गर्नुपर्छ । हामीले अझैसम्म समान अधिकार हाँसिल गर्न सकेका छैनौँ । जबसम्म समान उपलब्धि हाँसिल गर्न सक्दैनौँ, महिलामाथि हुने हिंसा अन्त्य हुन सक्दैन । हामीले यो अधिकार दिलाउने नीति निर्माण गर्नुपर्छ । सामाजिक आर्थिक रुपले आधारभुत तहको लैङ्गिक र सामाजिक, जातिय विभेदहरुको अन्त्य गर्दैनौँ, तबसम्म हामीले देखेको समुन्नत समाज निर्माण गर्न सक्दैनौँ । अब हाम्रो लडाईं स्थानीय तहमा ३३ प्रतिशत वडा अध्यक्ष महिला चाहिन्छ र ३३ प्रतिशत कार्यकारी पद लिनुपर्छ । मन्त्री पनि ३३ प्रतिशत चाहिन्छ, एक दुई जना नमूना राखेर हुँदैन, ३३ प्रतिशत हुनुपर्छ, अझ हामी त ५१ प्रतिशत हुनुपर्ने हो ।’
उपाध्यक्ष अर्यालले अब महिलाको लडाईं भनेको ३३ प्रतिशत वडा अध्यक्ष र मन्त्रीमण्डलमा पनि ३३ प्रतिशत हुनुपर्ने रहेको बताउनु भयो ।
