काठमाडौँ । प्रतिपक्षी दल राष्ट्रिय स्वतन्त्र पार्टी (रास्वपा)ले प्रधानमन्त्री पुष्पकमल दाहाल ‘प्रचण्ड’ को अभिव्यक्तिको विषयमा जवाफ माग गर्ने भएको छ ।
बुधबारको प्रतिनिधिसभा बैठकमा रास्वपाले प्रधानमन्त्री दाहालले व्यवसायी प्रितम सिंहको पुस्तक विमोचन गर्नेक्रममा दिएको अभिव्यक्तिप्रति आपत्ति जनाउँदै उक्त विषयमा जवाफ माग्न लागेको हो ।
‘हामी प्रधानमन्त्रीको अभिव्यक्तिको विषयमा जवाफ माग्छौं ।’ रास्वपाका प्रमुख सचेतक सन्तोष परियारले भने । यद्यपि, बैठक भने अवरुद्ध नगर्ने उनको भनाई छ ।
प्रधानमन्त्री दाहालको अभिव्यक्तिलाई लिएर प्रमुख प्रतिपक्षी दल एमालेले यसअघि नै प्रधानमन्त्री दाहालको राजीनामा माग गर्दै राष्ट्रिय सभा बैठक अवरुद्ध पारेको छ भने प्रतिनिधिसभा बैठक पनि अवरुद्ध पार्ने तयारी गरिरहेको छ ।
प्रितम सिंहमाथि किरणदीप सन्धुले लेखेको पुस्तक ‘रोड्स टु द भ्यालीः द लिगेसी अफ सरदार प्रितम सिंह इन नेपाल’ विमोचन कार्यक्रममा दाहालले आफूलाई प्रधानमन्त्री बनाउन व्यवसायी प्रितम सिंहले धेरै मिहिनेत गरेको र पटक–पटक दिल्लीसमेत धाएको अभिव्यक्ति दिएका थिए ।
