एजेन्सी । वेस्टइन्डिजले दोस्रो टि२० आई खेलमा पनि भारतमाथि रोमान्चक जित हात पारेको छ । भारतलाई दुई विकेटले पराजित गर्दैघरेलु टोली वेस्टइन्डिजले पाँच खेलको सिरिजमा २–० को अग्रता लिएको छ ।
जितको लागि १ सय ५३ रनको मध्यम लक्ष्य पछ्याएको वेस्टइन्डिजले १८.५ ओभरमा ८ विकेट गुमाउँदै पूरा गर्यो । वेस्टइन्डिजको जितमा विकेटकिपर निकोलस पुरनले ६ चौका र ४ छक्कासहित सर्वाधिक ६७ रनको योगदान दिए । १४ औं ओभरको अन्तिम बलमा निकोलस पुरन आउट भए ।
भारतलाई कप्तान हार्दिक पान्ड्याले पहिलो ओभरमै दुई विकेटको साथ उत्कृष्ट सुरुवात दिलाएका थिए । २–२ को अवस्थाबाट कायल मेयर्स ७ बलमा १५ रन बनाउदै अर्शदीप सिंहको बलमा एलबीडब्लू आउट भए । त्यतिबेला वेस्टइन्डिज ३.४ ओभरमा ३२–३ को दयनिय अवस्थामा रहेको थियो ।
चौथो विकेटका लागि रोभम्यान पावेल १९ बलमा १ चौका र १ छक्कासहित २१ रनमा क्याच आउट भए । पाँचौं विकेटका लागि पुरन र शिम्रन हेटमायरले ३७ रनको साझेदारी गरेका थिए । हेटमायर २२ रनमा आउट भए । यस्तै, जेसन होल्डर स्टम्पिङ आउट हुँदा अकिल हुसैन र अल्जारी जोशेफले २.५ ओभरमा २६ रनको अविजित साझेदारी गर्दै रोमाञ्चक जित दिलाए । अकिल हुसैन १६ तथा अल्जारी जोशेफ १० रनमा नट आउट रहे ।
भारतको लागि हार्दिक पान्ड्याले ४ ओभरमा ३५ रन खर्चेर ३ विकेट लिए । युजभेन्द्र चहलले २ विकेट लिए भने अर्शदीप सिंह र मुकेश कुमारले एक एक विकेट लिए ।
त्यसअघि टस जितेर पहिला ब्याटिङ रोजेको भारतले निर्धारित २० ओभरमा ७ विकेट गुमाउँदै १ सय ५२ रन बनायो । भारतका लागि तिलक बर्माले ४२ बलमा ५ चौका र १ छक्कासहित सर्वाधिक ५१ रनको योगदान दिए । विकेटकिपर ईशान किशन २७ रनमा आउट हुँदा ओपनर शुभमन गिल ७ रनमा क्याच आउट भए ।
यस्तै, सूर्यकुमार यादव एक रनमा बनाएर पेभेलिएनमा फर्किदा कप्तान हार्दिक पान्ड्या २४, सन्जु स्यामसन ७ र अक्षर पटेल १४ रनमा आउट भए ।
वेस्टइन्डिजका स्पिनर अकिल हुसैन, अल्जारी जोशेफ र रोमारियो शेफर्डले समान दुई दुई विकेट लिए ।
यस सिरीजको पहिलो खेलमा पनि वेस्टइन्डिजले भारतलाई चार रनले हराएको थियो । तेस्रो खेल मंगलबार, चौथो खेल शनिबार र पाँचौं खेल आइतबार हुनेछ ।
