एजेन्सी । मंगलबार भएको सुपर फोरको खेलमा भारतले श्रीलंकालाई ४१ रनले पराजित गर्यो । यो जितसँगै भारत फाइनलमा प्रवेश गरेको छ । पाकिस्तान र श्रीलंकालाई हराएको भारतले अब सुपर फोर चरणको अन्तिम खेल सेप्टेम्बर १५ मा बंगलादेशसँग खेल्नेछ ।
भारतको जितसँगै बंगलादेशको यात्रा समाप्त भएको छ । सेप्टेम्बर १५ मा भारतसँगको खेल उसका लागि औपचारिकता मात्र हो । फाइनल खेल्ने एक टोलीको टुंगो लाग्दा अर्कोतर्फ भने दुई टोलीबीच कडा भिडन्त हुने भएको छ । पाकिस्तान र श्रीलंकाबीचको विजेताले उपाधिका लागि भारतसँग भिड्ने भएका हुन् ।
बिहीबार आर प्रेमदासा मैदानमा पाकिस्तान र श्रीलंका भिड्नेछन् । यो खेल नकआउट हुनेछ । किनभने हार्ने टोलीको एसिया कपको यात्रा समाप्त हुनेछ भने जित्ने टोलीले उपाधिका लागि भारतसँग प्रतिस्पर्धा गर्नेछ ।
यदि वर्षा भयो र खेल रद्द भयो भने, राम्रो नेट रन रेटका कारण श्रीलंकाको टोली फाइनलमा पुग्नेछ । यस्तो अवस्थामा पाकिस्तानी फ्यानहरूले त्यस दिन पानी नपरोस् भनेर प्रार्थना गर्नेछन् ।
यस प्रतियोगिताको फाइनल खेल सेप्टेम्बर १७ मा कोलम्बोको आर प्रेमदासा रंगशालामा हुनेछ । यस खेलका लागि सेप्टेम्बर १८ लाई रिजर्भ डे राखिएको छ । विश्वकपअघिको तयारीका लागि यो प्रतियोगिता महत्वपूर्ण मानिएको छ । भारतीय टोलीले सर्वाधिक सात पटक (ओडीआई–टी२०) एसिया कपको उपाधि जितेको छ । यस्तै, श्रीलंकाले ६ पटक (ओडीआई–टी२०) र पाकिस्तानले २ पटक उपाधि जितेका छन् ।
