एजेन्सी । पाकिस्तानको एकदिवसीय वरियता खस्किएको छ । एकदिवसीय वरियतामा दोस्रो स्थानमा उक्लिएको भारतले पाकिस्तानलाई पछि पारेको हो ।
अन्तर्राष्ट्रिय क्रिकेट काउन्सिल (आईसीसी)ले बिहीबार जारी गरेको एकदिवसीय टोलीको वरियतामा अष्ट्रेलिया शीर्षस्थानमा रहेको छ ।
एसिया कप २०२३ को अन्तिम सुपर ४ खेलमा पाकिस्तान श्रीलंकासँग २ विकेटले पराजित भएको थियो । यो हारका कारण हार बेहोरेको पाकिस्तान तेस्रो स्थानमा झरेको हो ।
एकदिवसीय वरियतामा दोस्रो स्थानमा रहेको भारतीय टोलीको कुल ११६ रेटिङ अंक छ र उसले पाकिस्तानलाई एक रेटिङ अंकले पछाडि पारेको छ । अष्ट्रेलिया आईसीसीको वरियतामा ११८ रेटिङ अंकका साथ पहिलो स्थानमा छ ।
गत महिना, एसिया कप सुरु हुनुअघि पाकिस्तानले श्रीलंकामा अफगानिस्तान विरुद्धको एकदिवसीय शृंखला ३–० ले जित्यो र अस्ट्रेलियालाई उछिन्दै आईसीसी एकदिवसीय वरियतामा नम्बर १ बनेको थियो । नेपाल वरियताको १५ औं स्थानमा यथावत छ ।
