एजेन्सी । इंग्लिस प्रिमियर लिग फुटबल अन्तर्गत आर्सनल र टोटेनहमले बराबरी खेलेका छन् । भर्खरै सम्पन्न ‘नर्थ लण्डन डर्बी’मा दुबै टोलीले २–२ गोलको बराबरी खेल्दै अंक बाँडेका हुन् ।
घरेलु मैदान इमिरेट्समा आर्सनलले सुरुवाती अग्रता लिएको थियो । खेलको २६ औं मिनेटमा आर्सनलका बुकायो साकाले प्रहार गरेको बल टोटेनहमका क्रिस्टियन रोमेरोलाई लागेर आत्मघाती गोल हुन पुगेको थियो ।
तर, ४२ औं मिनेटमा टोटेनहमका कप्तान सन हेउंग मिनले गोल गर्दै टोटेनहमलाई १–१ गोलको बराबरीमा ल्याए । ५४ औं मिनेटमा आर्सनलले पेनाल्टी पायो । जसलाई बुकायो साकाले खेर जान दिएनन् ।
डि–बक्स भित्र रोमेरोकै हातमा बल लागेपछि आर्सनलले पेनाल्टी जितेको थियो । यस गोलबाट आर्सनल २–१ ले अघि बढ्यो । तर, त्यसको एक मिनेटपछि नै अर्थात् ५५ मिनटेमा सनले व्यक्तिगत तथा टोलीका लागि दोस्रो गोल गर्दै खेललाई २–२ को बराबरीमा ल्याए ।
त्यसपछि दुबै टिमबाट गोल गर्ने प्रयास भएपनि सफल हुन सकेनन् र एक–एक अंक बाँडे । यो नतिजासँगै टोटेनहम ६ खेलबाट १४ अंकका साथ चौंथो तथा समान खेलबाट समान अंकसहित आर्सनल पाँचौं स्थानमा रहेको छ ।
