काठमाडौँ । १९औँ एसियाली खेलकुद, २०२२ अन्तर्गत ई स्पोर्टस् विधामा पब्जी मोबाइलको पिस एलिट प्रतिस्पर्धामा नेपाली टोली सेमिफाइनलमा प्रवेश गरेको छ ।
हाङझाउ स्पोर्टस् सेन्टरमा आज भएको एलिमिनेसन राउन्डको समूह ‘सी’ मा दोस्रो हुँदै नेपाल सेमिफाइनलमा पुगेको हो । नेपाली टिममा सुबिनकुमार प्रजापति, दिपेश गुरुङ, समिर गुरुङ, संगिन भट्टराई र साहस भण्डारी रहेका छन् ।
नेपालको समूहमा हङकङ, प्लेस्टाइन र साउदी अरेबिया थिए । जसमा हङकङ शीर्ष स्थानमा रहँदा नेपालले प्लेस्टाइन र साउदीलाई पछि पारेको हो ।
अब चार समूहबाट आएका शीर्ष दुई–दुई टिम गरी आठ टिमबीच दुई समूहमा सेमिफाइनल हुनेछ । सेमिफाइनलका दुवै समूहमा चार–चार टिम हुनेछन् ।
चार–चार टिम मध्ये समूहका शीर्ष दुई टिमले फाइनल खेल्नेछन् । फाइनल चरणमा चार टिमबीच प्रतिस्पर्धा हुनेछ । जसमा शीर्ष तीन टिमलाई मेडल प्रदान गरिनेछ ।
नेपालले भोलि शनिबार हुने समूहमा दोस्रो स्थान हात पारे फाइनलमा स्थान बनाउनेछ भने पर्सी आइतबार हुने फाइनलमा शीर्ष तीन भित्र पर्न सके नेपालले एसियाली खेलकुदमा पदक हात पार्नेछ ।
