काठमाडौं। पूर्वराजा ज्ञानेन्द्र शाहले देशमा भइरहेको गतिविधिबाट पाठ सिकेर अघि बढ्न सुझाव दिनु भएको छ ।
मंगलवार महाराजगञ्जस्थित निर्मल निवासमा विजया दशमीको अवसरमा सर्वसाधारणलाई टिका लगाइदिँदै उहाँले यस्तो बताउनुभएको हो ।
उहाँले व्यंग्यात्मक रुपमा देशमा भइरहेका गतिविधिप्रति लक्षित गर्दै छिनछिनमा भुइँचालो गइरहेकाले विचार गरेर बस्न आग्रह गर्नुभयो ।
उहाँले भन्नुभयो, ‘सम्पूर्ण दिदीबहिनी तथा दाजुभाईहरुमा दशैँको शुभकामना दिन चाहन्छु । धेरै भन्नु पनि हुँदैन, सप्तमीको दिनमा भनेको छु । हामीले पाठ पनि सिक्नु पर्नेछ । छिनछिनमा भुइँचालो पनि आइरहेको छ । विचार गर्नुस् ।’
पूर्वराजा शाहले नेपालीहरुको महान चाड विजयादशमीको अवसरमा सम्पूर्ण नेपालीहरुमा शुभकामना दिनुभयो । उहाँले यसअघि अपरान्ह पौने चार बजेबाट आम सर्वसाधारणलाई दशैँको टिका लगाइदिनु भएको थियो ।
पूर्वराजासँग टीका थाप्न झण्डै पाँच हजार मानिस निर्मल निवास पुगेका थिए ।
राप्रपाका नेता रवीन्द्र मिश्रले झण्डै तीन घण्टा लाममा बस्नु परेको जनाउँदै अर्को वर्ष राजदरबारमै टीका थाप्न पाइयोस् भनेको सामाजिक संजालमा लेख्नु भएको छ ।
