एजेन्सी । इंग्लिस प्रिमियर लिग फुटबल अन्तर्गत चेल्सीले टोटेनहममाथि सानदार जित निकालेको छ । गएराति भएको दुई लण्डन क्लबबीचको प्रतिस्पर्धामा चेल्सीले टोटेनहमलाई उसकै घरेलु मैदानमा ४–१ गोलले पराजित गरेको हो । खेलमा चेल्सीका निकोलास ज्याक्सनले ह्याट्रिक समेत गरे ।
अर्कोतर्फ चेल्सीसँगको हारसँगै टोटेनहमका जारी लिगमा अपराजित यात्रा समेत समाप्त भएको छ । टोटेनहम मात्रै लिगमा अपराजित रहेको थियो ।
खेलको छैटौं मिनेटमा डेजान कुलुसेभ्स्कीले गोल गर्दै घरेलु टोली टोटेनहमलाई सुरुवाती अग्रता दिलाएका थिए । ३५ औं मिनेटमा कोल पाल्मेरले पेनाल्टीमार्फत गोल गर्दै चेल्सीलाई १–१ गोलको बराबरीमा ल्याए । त्यसपछि खेलको दोस्रो हाफमा ७५, ९०+४ र ९०+७ औं मिनेटमा गोल गर्दै ज्याक्सनले ह्याट्रिक पूरा गरे ।
टोटेनहमका दुई खेलाडीले रातो कार्ड खान पुगेका थिए । खेलको ३३ औं मिनेटमा किस्टियन रोमेरोले तथा ५५ औं मिनेटमा डेस्टिनी उडोगीले रातो कार्ड खाएका हुन् ।
यो नतिजासँगै टोटेनहमलाई अंकतालिकामा शीर्षस्थानमा उक्लने मौका गुमेको छ । उसको ११ खेलबाट २६ अंक हुँदा एक अंक बढी रहेको म्यान्चेस्टर सिटी शीर्षस्थानमा छ । उता, चेल्सी समान खेलबाट १५ अंकका साथ १० औं स्थानमा छ ।
